Müsavat Partiyasının

b ə y a n a t ı

Xəbər verildiyi kimi “Azadlıq” qəzetinin baş redaktoru Qənimət Zahidin, onun qardaşı, həmin qəzetin əməkdaşı, satirik şair Mirzə Sakitin atası Səlim Zahidov dünyasını dəyişib. Artıq xeyli müddətdir ki, uydurma ittihamlarla həbsdə yatan Qənimət Zahid və Mirzə Sakitin atalarının yas mərasimində iştirak etmək üçün müvəqqəti olaraq həbsdən buraxılması xahişi ilə Müsavat Partiyası hakimiyyətə müraciət etmişdi. Müsavat Deputat Qrupunun üzvləri bununla bağlı bir sıra dövlət rəsmiləri ilə danışıqlar aparmışdı. Ölkədəki bir sıra siyasi təşkilatlar və ictimai qurumlar, eləcə də ictimaiyyət nümayəndələri eyni təşəbbüslə çıxış etmişdilər. Dünən axşam hər iki yazar atalarının yas mərasimində iştirak etmək üçün müvəqqəti olaraq həbsdən buraxılıb.

Müsavat Partiyası hakimiyyətin ictimaiyyətin təklifi istiqamətində atdığı bu addımı təqdir edir. Bununla yanaşı biz, bir daha hakimiyyətə müraciət edirik ki, artıq xeyli müddətdir qeyri-qanuni olaraq həbsdə saxlanılan Qənimət Zahidin, Mirzə Sakitin və Eynulla Fətullayevin birdəfəlik azadlığa buraxılması istiqamətində konkret addım atsın. Xatırladırıq ki, bu tək Müsavat Partiyasının yox, bir çox nüfuzlu beynəlxalq təşkilatların, eləcə də Azərbaycan İctimaiyyətinin mövqeyidir.

isagambar.az, 03 dekabr 2008-ci il, Bakı