Nekroloq

Azərbaycan jurnalistikasına ağır itki üz verib. Tanınmış jurnalist və publisist Məmməd Nazimoğlu yaradıcılığının yetkin vaxtında vəfat edib. Jurnalistikamızda istedadı, orijinallığı, təvazökarlığı ilə tanınan Məmməd Nazimoğlu özünəməxsus üslubu ilə Azərbaycanda söz və mətbuat azadlığının hüdudlarının genişlənməsinə xidmət göstərməklə yanaşı cəmiyyətin siyasi fəallığının artmasında da rol oynamışdır. Azərbaycanda milli azadlıq hərəkatı başlayarkən onun “Aydınlıq” qəzetindəki satira ilə yoğrulmuş yazıları ictimai rəyin formalaşmasına ciddi təsir edirdi. Sonrakı illərdə müxtəlif qəzetlərdə çalışan Məmməd Nazimoğlu özünün bu dəsti-xəttinə sadiq qalmış, müstəqil jurnalist kimi azad yaradıcılıq prinsiplərini dönmədən müdafiə edə bilmişdi.

Müsavat Partiyası bu böyük itki ilə bağlı mərhumun ailəsinə, yaxınlarına və ölkəmizin demokratik ictimaiyyətinə dərin hüznlə baş sağlığı verir, mərhuma Allahdan rəhmət diləyirik.

Qəbri nurla dolsun!

İsa Qəmbər və Müsavat Partiyasının Divanı

isagambar.az, 07 iyul 2008-ci il, Bakı