Müsavat Məclisinin növbəti toplantısı

Bu gün Müsavat Partiyası Məclisinin növbəti toplantısı keçirilib. Toplantının gündəliyi aşağıdakı şəkildə olmuşdur:

1. Azərbaycan Respublikasında 15 oktyabr 2008-ci ildə keçirilən Prezident seçkilərinin nəticələri haqqında.
2. Azərbaycanda seçkisonrası vəziyyət və partiyanın vəzifələri.
3. Ermənistan-Azərbaycan konfliktinin həlli Cənubi Qafqazda yaranmış yeni şəraitdə.
4. Cari məsələlər.

Gündəlikdə olan məsələlərlə bağlı partiyanın başqanı İsa Qəmbər, Məclisin sədri Sülhəddin Əkbər və Mərkəzi İcra Aparatının rəhbəri Arif Hacılı məruzə ilə çıxış ediblər. Müzakirələrdən sonra Məclis 15 oktyabr 2008-ci il Prezident seçkilərinin nəticələri haqqında yekun rəy sənədini, seçkisonrası dövr üçün partiyanın fəaliyyət istiqamətləri və Ermənistan-Azərbaycan konfliktinin həlli üçün yeniləşdirilmiş “Uğur” paketini qəbul edib.

2009-cu ildə ulu öndər M. Ə. Rəsulzadənin anadan olmasının 125 illik yubileyinin tamam olması ilə əlaqədar Məclis 2009-cu ili “M. Ə. Rəsulzadə ili” elan edilməsi və bununla bağlı bir sıra tədbirlərin həyata keçirilməsi haqqında qərar qəbul edib.

Yığıncağın sonunda cari məsələlər müzakirə edilib.

isagambar.az, 08 noyabr 2008-ci il, Bakı