Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər müzakirə edilib. Kürdəmir rayon təşkilatının dünən keçirilən konfransı haqqında məlumat dinlənilib. Konfransda Vilayət Abuşov rayon təşkilatının yeni sədri seçilib. Divan Nizamnamə müddəti bitdiyinə görə sədr postunu tərk etmiş Baha Mikayılova sədr postundakı səmərəli fəaliyyətinə görə təşəkkür elan edib. Müsavatın mütinqlərinə razılıq vermədiyi üçün 17.06.08 tarixində, saat 12:00-da Bakı Şəhər İcra Hakimiyyətinin binası qarşısında piket keçirilməsi barədə həmin quruma müraciət edilməsi qərara alınıb.

Toplantıda xalq hərəkatının lideri Əbülfəz Elçibəyin 70 illik yubiley tədbirlərinə hazırlığın gedişi haqqında fikir mübadiləsi aparılıb və dəvət ediləcək qonaqların siyahısı müəyyənləşdirilib.

Sonra ölkədəki ictimai-siyasi vəziyyət və qarşıdan gələn prezident seçkiləri ilə bağlı məsələ ətrafında geniş müzakirələr aparılıb və müvafiq qərarlar qəbul edilib. “Sərbəst Toplaşmaq Haqqında” yeni qanun layihəsinin qəbulundan və “Seçki Məcəlləsi”nə edilən yeni əlavə və düzəlişlərdən sonra ölkədə fərqli siyasi situasiyanın yarandığı bildirilir. Qeyd olunub ki, “Seçki Məcəlləsi”nin daha da mürtəceləşdirilməsi hakimiyyətin azad və ədalətli seçkilər keçirmək niyyətinin olmamasından, hakimiyyəti yenidən qəsb etmək planlarını işə salmasından xəbər verir.

Qərara alınıb ki, hələ 2007-ci ilin oktyabrında partiya məclisinin “2008-ci il prezident seçkilərində iştirak barədə” qərarında iştirakdan imtina variantının da istisna olunmamasını nəzərə alaraq, indiki mərhələdə seçkilərə hazırlığın tam həcmdə davam etdirilməsi şərti ilə bu mövzu ətrafında müzakirələr partiyanın bütün strukturlarında davam etdirilsin.

Axırda bir sıra cari məsələlərə baxılıb.

isagambar.az, 09 iyun 2008-ci il, Bakı