MÜSAVAT PARTİYASI AQİL XƏLİLLƏ BAĞLI YAYIMLANAN SÜJETLƏRİ İCTİMAİYYƏT ÜÇÜN HƏQARƏT SAYIR

Müsavat partiyası jurnalist Aqil Xəlil barədə telekanallarda yayımlanan süjetləri bütövlükdə ölkə jurnalistikasına və cəmiyyətinə həqarət kimi dəyərləndirir və bu biabırçı kampaniyaya son qoymağa çağırır. Bu cümlə Müsavat partiyasının bu gün yaydığı bəyanatdandır.

Müəlliflər bir sıra telekanallarda "Azadlıq" qəzetinin əməkdaşı Aqil Xəlilin şərəf və ləyaqətini təhqir edən kadrlar yayımladığını bildirir. Sənəddə deyilir ki, bu kadrların yayımlanmasında məsqəd A.Xəlilin bu ilin fevralında fiziki zorakılığa məruz qalması və martında bıçaqlanması faktını ört-basdır etməkdir. Müəlliflər hüquq-mühafizə orqanlarının jurnalisti hansısa homoseksualistin bıçaqlaması kimi versiyasını öz saxtakarlıq səviyyəsinə görə ölkə ictimaiyyətini və beynəlxalq qurumların təmsilçilərini şoka salan hadisə kimi dəyərləndiriblər.

Daha sonra müəlliflər jurnalist Aqil Xəlilin zərərçəkən olsa da, günlərlə istintaq altında saxlanılmasını, şikayətini geri götürməyəcəyi halda şərlənəcəyi barədə xəbərdarlıqları yada salırlar. "Vətəndaşların və xüsusilə hakimiyyət üçün "arzuolunmaz" şəxslərin belə təxribatlara çəkilməsinin, illər əzində bu cür qarayaxmaların, böhtan və şantajların çox şahidi olmuşuq", - deyə sənəddə qeyd edilir.

Son olaraq, müəlliflər jurnalisti döyən və bıçaqlayan həqiqi təqsirkarların dərhal məsuliyyətə cəlb olunmasını tələb etdiklərini bəyan edirlər.

BAKI/10.04.08/TURAN