Növbəti toplantı

Bu gün Müsavat Partiyası Divanının növbəti toplantısı keçirilib. Toplantıda ictimai-siyasi vəziyyətə dair bir sıra məsələlərə baxılıb. AŞ PA-nın Azərbaycan üzrə həmməruzəçilərindən biri Yevgeniya Jivkovanın “ölkədə mətbuatın əsas probleminin qəzetlərin siyasi partiyalara yaxın olmasını və həbsdə olan jurnalistlərin azad olunmasını tələb etməyəcəyini” bildirməsi Divan üzvlərinin təəccüb və təəssüfünə səbəb olub. Qeyd olunub ki, Yevgeniya Jivkova Azərbaycan üzrə həmməruzəçi təyin olunanda onun iqtidaryönlü olacağı haqda proqnozlar təsdiq olunmağa başlayır.

Daha sonra Xocalı faciəsinin ildönümü ilə əlaqədar tədbirlər müzakirə olunub. Son günlər səslənən təklif və təşəbbüslər müzakirə edildikdən sonra Divanda qərara alınıb ki, bu il fevralın 26-da Xocalı faciəsinin ildönümünü qeyd etmək məqsədi ilə Azadlıq meydanında birgə mitinq keçirilməsi YAP da daxil olmaqla bütün siyasi partiyalara təklif edilsin.

İlham Əliyevin Ağdamdakı çıxışı zamanı İrəvanın ADR liderləri tərəfindən ermənilərə verilməsini deməsindən sonra hakimiyyət dairələrində və iqtidaryönlü mətbuatda onlara qarşı başladılmış əks-təbliğat kampaniyası ciddi müzakirə edilmişdir. Qərara alınıb ki, 15 fevral 2008-ci il tarixində bu məsələyə həsr olunmuş Dəyirmi Masa keçirilsin.

Toplantıda payızda keçiriləcək prezident seçkiləri ilə bağlı ayrıca məsələ müzakirə edilib və bir sıra təşkilati xarakterli qərarlar qəbul edilib.

Axırda bir sıra cari məsələlərə baxılıb.

isagambar.az, 11 fevral 2008-ci il, Bakı