Növbəti toplantı

Bu gün Müsavat Partiyası Divanının növbəti toplantısı keçirilib. Öncə qərarların icra vəziyyəti və görülən işlər müzakirə edilib. Divan Gürcüstanda yaranmış vəziyyəti ətraflı müzakirə edib və qeyd edilib ki, Cənubi Osetiyadakı separatçı rejimin provakasiyalarının qarşısını almaq və ərazi bütövlüyünü bərpa etmək məqsədi ilə Gürcüstan dövlətinin addımlar atdığı bir dövrdə Rusiya bu ölkəyə qarşı iri miqyaslı təcavüzkar müharibəyə başlamışdır. Müsavat Partiyası əvvəlki bəyanatlarında olduğu kimi Rusiyanın bu təcavüzkar mövqeyini qətiyyətlə pisləyir, təcavüzkardan öz hərəkətlərinə dərhal son qoyulmasını tələb edir. Partiya Divanı münaqişə bölgəsindən rus qoşunlarının çıxarılmasını, həmin ərazilərə beynəlxalq sülhməramlı qüvvələrin yeridilməsini, bütün məsələlərin beynəlxalq hüquq normalarına uyğun olaraq Gürcüstanın ərazi bütövlüyü çərçivəsində həll edilməsini tələb edir.

Partiya Divanı eyni zamanda Azərbaycan hakimiyyətinin bu məsələlərə münasibətdə mövqesizliyini tamamilə yanlış hesab edir. Analoji problemlə üzləşən Azərbaycanın hakim rejiminin Bakı-Ceyhan neft kəmərinin raket atəşinə tutulduğu, Poti limanının neft daşıyan qurğularının sıradan çıxarıldığı, BTC-nin Türkiyə ərazisindəki partlayışından sonra kəmərin hələ də bərpa edilmədiyi bir vaxtda formal bəyanatla kifayətlənməsi, Rusiya təcavüzünə münasibət bildirməməsi, Gürcüstana zəruri dəstək verilməməsi məntiqdən kənardır.

Partiya Divanı Rusiyanın Gürcüstandakı təcavüzkar hərəkətlərinə etiraz əlaməti olaraq Rusiya səfirliyi qarşısında piket keçirən 5 müsavatçı gəncin azad olunmasını tələb etmiş, bir daha hakimiyyəti “Vətəndaşların Sərbəst Toplanması Haqqında” Qanunun müddəalarına əməl etməyə çağırmışdır.

Axırda bir sıra cari məsələlərə baxılıb.

isagambar.az, 11 avqust 2008-ci il, Bakı