MÜSAVAT BAŞQANI GƏNCLƏRLƏ GÖRÜŞDÜ
İsa Qəmbər: “Seçkidə hakimiyyəti çətin vəziyyətə salacağıq”
“Sizi Azərbaycanın gələcəyi uğrunda mübarizəyə çağırıram”

Müsavat başqanı İsa Qəmbər dünən partiyanın mərkəzi qərargahında gənclərlə görüş keçirdi. Azərbaycanın dövlət himninin səsləndirilməsindən sonra tədbiri giriş sözü ilə Müsavat Partiyası Gənclər Təşkilatının (GT) sədri Tural Abbaslı açdı. O qeyd etdi ki, gənclərin mövcud hakimiyyətin əməllərini sakit qarşılaması xoşagəlməz haldır. “Gənclərin susması cəmiyyətin məhvi deməkdir. Bəllidir ki, bu ilin payızında Azərbaycanda prezident seçkisi keçiriləcək.

Müsavat başqanı İsa Qəmbər ən real namizədlərdən biridir, hakimiyyətin əsas rəqibidir. Biz problemlərimizin həlli üçün bu seçkidə maksimum aktiv olmalıyıq. Mən bütün gəncləri mübarizəyə səsləyirəm”,- deyə GT sədri bildirdi.

Gənclərin qarşısında çıxış edən İsa Qəmbər onlara “sizin aranızda prezident olmağı düşünən varmı” suallarını ünvanladı. Başqanın bu sualına cavab olaraq cəmi 3 nəfər əlini qaldırdı. İsa bəy “bəs Şuşaya Azərbaycanın bayrağını sancmağa hazır olan necə” soruşanda isə zaldakıların hamısı əlini qaldırdı. İsa bəy onlara “eşq olsun” deyərək nitqini davam etdirdi: “Bu gün Azərbaycanımız problemlər içərisindədir. Bu problemlərin həlli yolu azadlıqlardan, azadlıqlar uğrunda mübarizədən keçir. Söz, mətbuat, sərbəst toplaşma, siyasi fəaliyyət azadlığı, xalqın öz taleyini öz qərarı ilə həll etmək, hakimiyyəti dinc yolla dəyişmək azadlığı olmayan yerdə başqa problemlərin həlli mümkün deyil. Bu azadlıqlar uğrunda mübarizə isə insanlardan, hər birimizdən asılıdır. Mən ona görə də çıxışımı suallarla başladım ki, sizin məqsədiniz, amalınız varmı, özünüzü hansısa hadisələrə hazırlayırsınızmı? Çünki bir çox hallarda insanlarda belə əhval-ruhiyyə hökm sürür ki, problem var, ancaq onu kimlərsə həll eləyəcək. Məntiqlə normal mövqedir, problem varsa, kimsə onu həll eləməyə çalışacaq və onu yoluna da qoyacaqlar. Ancaq təsəvvür edin ki, hamımız bu məntiqlə düşünək ki, bizsiz də hər şey həll olunacaq. Bu halda biz o hərəkatı kimdən gözləyirik? Hesab edirəm ki, hər bir insan ağılı, məntiqi ilə dərk eləsə ki, bu problemi başqası həll edə bilər, amma hər kəs ürəyi ilə, qəlbi ilə hiss eləmədir ki, mən olmasam Azərbaycan azad, demokratik bir ölkəyə çevrilməyəcək. Hər birimiz onu hiss etməliyik ki, əgər mən döyüşməsəm, mübarizə aparmasam Qarabağımız, Şuşamız azad olmayacaq. Ürəyimizdən keçməlidir ki, Əliyev rejiminə qarşı mən mübarizə aparmasam, başqaları bunu aparmaz, mənsiz bunu edə bilməzlər”.

Gənc xanımların da hərəkatda, siyasi proseslərdə önəmli rolunun olduğunu vurğulayan İsa bəy bununla bağlı bir neçə nümunə göstərdi: “Bu il ölkədə növbəti prezident seçkiləri keçiriləcək. Amma inamsızlıq fəaliyyəti bir xeyli çətinləşdirir. Siyasi qüvvələrin də bir hissəsi bu seçkilərdə iştirakı düzgün hesab eləmir, boykota üstünlük verirlər. Biz hər bir qərara hörmətlə yanaşırıq. Onların arqumentlərini də başa düşürük, ölkədə baş verənləri, reallıqları bilirik. Adama elə gəlir ki, bu vəziyyətdə hakimiyyəti seçki yolu ilə dəyişmək mümkün deyil. Mümkün deyilsə, oturaq gözləyək, görək sonra nə olur. Təbii, deyək mübarizə aparırıq və sair. Ancaq, əgər builki seçkilərdə siyasi müxalifət iştirak eləməyəcəksə, gələn seçkilərdə nə olacaq? Əliyevlər rejimi kövrələcək, əməllərindən peşman olacaq? Rejim utanacaqmı ki, gör nə pis oldu, seçkiləri saxtalaşdırdığımız üçün siyasi müxalifət seçkiyə qatılmadı, gəl bu dəfə seçkini demokratik keçirək, hamı qatılsın. Rejim bunu edəcəkmi? Bu hakimiyyətdə utanan üz, millət qarşısında məsuliyyət hissi varmı ki, biz də bu cür fikirləşək ki, bu seçkilərdə iştirak etməsək gələn seçkilərdə vəziyyət dəyişəcək? Yox. Bu hakimiyyət təbii ki, demokratik seçki görüntüsü yaratmaq istəyir. Amma hakimiyyətin əsas qayğısı iqtidarı əllərində saxlamaq, bu milləti, ölkənin var-dövlətini soymaq, daha da varlanmaq, zənginləşməkdir. Xalq bu hakimiyyəti dəyişməsə, onlar öz xoşu ilə demokratikliyə, ciddi dəyişikliyə getməyəcəklər. Yalnız mübarizə ilə vəziyyəti dəyişmək mümkündür. Mübarizədə aktivlik, hərəkət, mövqe tutmaq deməkdir. Biz bu mübarizənin çətinliyini bilirik. Ancaq inanırıq ki, hakimiyyəti çətin vəziyyətə sala biləcəyik. Qələbənin mümkünlüyünə də inanırıq. Mən bircə onu etiraf edirəm ki, gənclərin fəallığı olmasa, biz bunu bacarmayacağıq. Ona görə də məsuliyyətin bir hissəsi sizin üzərinizdədir. Dəyişikliyə inananların sayı çoxluq təşkil eləməyə başlasa, o zaman dəyişiklik labüddür. Buna görə biz sizdən fəallıq, hərəkət və bu hərəkətdə birgə olmağı istəyirik. Biz bu seçkidə hakimiyyəti yerində oturtmağı bacarmalıyıq. Hakimiyyət özünü qorxmayan kimi göstərsə də, hədyanlar danışsa da, repressiyalar həyata keçirsə də, cəmiyyətdən və müxalifətdən qorxur. Əgər hakimiyyət qorxmasaydı, özünə arxayın olsaydı, bu cür məhdudiyyətlərə getməzdi. Ancaq hakimiyyət müxalifət liderlərini televiziyaya yaxın buraxmaq istəmir. Bilirlər ki, real liderlərə efir qadağaları götürülsə, normal siyasi fəaliyyətə, sərbəst toplaşmağa imkan verilsə, qısa müddətdə hakimiyyət dəyişəcək. Sadəcə, ölkədəki vəziyyəti dəyişmək üçün cəmiyyətdə inamı bərpa etmək lazımdır. Mən bu il Azərbaycanda hakimiyyətin dəyişməsinin mümkünlüyünə inanıram. Və bu yolda mübarizə aparacam. On minlərlə müsavatçı bu yolda mənimlə bir yerdə olacaq. Ancaq yenə təkrar edirəm ki, gənclər hərəkətə getməsələr, başqalarını fəallaşdırmasalar vəziyyət həddən artıq çətin olacaq. Ona görə də sizi Azərbaycanın gələcəyi uğrunda mübarizəyə çağırıram. Sizin gələcəyiniz uğrunda, müstəqil, demokratik, firavan, bütöv Azərbaycan qurmaq uğrunda mübarizəyə çağırıram. Tanrı Azərbaycanımızı qorusun!”.

Daha sonra çıxış edən Müsavatın İcra Aparatının rəhbəri Arif Hacılı bildirdi ki, ölkənin ən böyük problemi indiki hakimiyyətin mövcudluğudur: “Biz hamımız bu hakimiyyətin kənarlaşması uğrunda mübarizə aparmalıyıq. Dünya ölkələri sırasında Azərbaycan demokratiyaya keçidə növbədə birinci yerdə dayanıb. Yəni Belorusda, Rusiyada, Çində də demokratiya uğrunda mübarizə aparan qüvvələr var. Bizim nikbinliyimizin başlıca səbəbi ondan ibarətdir ki, Azərbaycan cəmiyyəti dəyişikliklər istəyir. Əgər Rusiyada demokratik seçkilər olsa, yenə Putinin dediyi adam prezident seçilər. Belarusda demokratik seçki olsa, yenə Lukaşenko qalib gələr. Ancaq Azərbaycanda demokratik seçkilər keçirilərsə, demokratik qüvvələr qalib gələcək, Müsavat qalib gələcək, Müsavatın namizədi İsa Qəmbər qalib gələcək. Bunu hətta antidemokratik, saxtalaşdırılmış seçkilərin nəticələrinə əsaslanıb deyə bilirik”.

A.Hacılı Stalin rejimi ilə Azərbaycan hakimiyyətinin apardığı siyasət arasında bir çox oxşar cəhətlərin olduğunu dedi: “Ancaq əsas fərq ondan ibarətdir ki, sovet xalqı Stalini sevirdi, Azərbaycan xalqı isə İlham Əliyevi sevmir. Çünki cəmiyyətimiz kifayət qədər dünyagörünüşünə malikdir və demokratik keçidə hazırdır. Buna mane olan ancaq hakimiyyətdir. Biz ona görə nikbinik ki, Azərbaycanın fədakar, həbslərdən qorxmayan, repressiyalardan çəkinməyən demokratik qüvvələri, bütün ölkə boyunca strukturlara malik və dönməz mübarizə aparan Müsavat kimi partiyası, demokratik qüvvələrin bu ölkəni gələcəyə aparacaq İsa Qəmbər kimi lideri var”.

Daha sonra İsa Qəmbər gənclərin çoxsaylı suallarını cavablandırdı.

Elşad MƏMMƏDLİ, Yeni Müsavat, 12.04.2008