Növbəti toplantı

Bu gün Müsavat Partiyası Divanının növbəti toplantısı keçirilib. Gündəlikdə qərarların icrası, görülən işlər, partiyadaxili və ictimai-siyasi vəziyyətə dair məsələlər olub. Yığıncağın əvvəlində ötən həftə keçirilən tədbirlər, o cümlədən şənbə günü Müxalifətin Əməkdaşlıq Mərkəzinin (MƏM) Müsavatın qərargahında keçirdiyi forum dəyərləndirilib.

İctimai-siyasi vəziyyətə dair məsələnin müzakirəsi zamanı müxalifətdaxili əməkdaşlıq haqqında müzakirələr aparılıb. MƏM-in oktyabrın 18-də şəhərin mərkəzi meydanlarından birində mitinq keçirmək üçün Bakı şəhəri İH-nə müraciət etməsi müsbət qiymətləndirilib.

Prezident seçkilərindən sonra müxalifətin birgə fəaliyyəti imkanları və istiqmətləri haqqında fikir mübadiləsi davam etdirilib.

Divan hakimiyyətdən 18 Oktyabr Müstəqillik gününün rəsmi dövlət bayramı kimi qeyd edilməsini, xalqın ən müqəddəs bayramlarından birinə bu cür sayğısızlığı aradan qaldırmağı tələb edib.

Davam edən ümumdünya iqtisadi böhranı da müzakirə edilən məsələlər arasında olub. Bu qlobal iqtisadi böhran və onun Azərbaycana, xüsusən də maliyyə-bank sektoruna təsiri haqqında ətraflı fikir mübadiləsi aparılıb. Divan hesab edir ki, hökumət bu böhranın Azərbaycan iqtisadiyyatına təsiri olmayacağı haqqında məsuliyyətsiz bəyanatlar verməyi bir kənara qoyaraq, ölkə iqtisadiyyatını bu böhranın təsirlərindən qorumaq üçün təxirəsalınmaz təsirli tədbirlər görməlidir.

Axırda bir sıra cari məsələlərə baxılıb.

isagambar.az, 13 oktyabr 2008-ci il, Bakı