“Hörmətli Anar bəy!
Sizi, 70 illik yubileyiniz münasibəti ilə təbrik edir, Sizə uzun ömür, cansağlığı arzulayıram.
Siz Azərbaycan ədəbiyyatının canlı klassiklərindən birisiniz. 60-cı illər ədəbi nəslinin ən parlaq nümayəndələrindən biri kimi ədəbiyyatımıza yeni nəfəs gətirmiş, söz sənətimizin ideoloji ehkamlardan qurtulması, həyat həqiqətləri ilə zənginləşməsi yolunda misilsiz xidmətlər göstərmisiniz. Hələ gənc yaşlarında yazdığınız hekayə və povestlərlə nəinki həyata yeni ədəbi baxışın başlanğıcını qoymuş, eyni zamanda yeni oxucu nəslinin yaranmasında və formalaşmasında əvəzsiz xidmətlər göstərmisiniz. Hər bir yenilik kimi Sizin də ədəbiyyatımıza gətirdiyiniz yeni ruh, yeni bədii obrazlar ciddi müqavimətlərlə rastlaşır, əsassız tənqidlərə hədəf olur. Lakin belə müqavimətlər və tənqidlər heç bir zaman həqiqi istedadın qarşısına sədd çəkə bilməyib və bilməyəcək. İstər ədəbi əsərlərinizdə, istərsə də kino və teatr sahəsində yaratdığınız zəngin irs bu gün milli mədəniyyətimizin və mənəviyyatımızın iftixarıdır. Sizin qələminizdən çıxan məqalə və esselər, xüsusilə rəhbərliyiniz altında nəşr edilən “Qobustan” dərgisi publisistikamızın sonrakı inkişafına güclü təkan verib.
Azərbaycan cəmiyyətində Sizi həm də görkəmli bir ziyalı kimi tanıyırlar. Bir çox çətin tarixi və milli sınaqlar dönəmində məhz Sizin mövqeyiniz proseslərin düzgün axara istiqamətlənməsində həlledici rol oynayıb. Azərbaycan cəmiyyətinin, bütövlükdə xalqımızın fikrinə və mövqeyinə ehtiyac duyduğu çox nadir ziyalılarımızdan birisiniz. Bəzən ünvanınıza səslənən qərəzli yox, səmimi tənqidlər də məhz burdan qaynaqlanır. Çünki Siz cəmiyyətin bütün kəsimlərinin umacağı olan bir insansınız. Əlbəttə, bu çox çətin bir missiyadır, amma bu missiyanı daşımaq şərəfini istedadınız və zəkanızla Siz özünüz qazanmısınız.
Hörmətli Anar bəy!
Bir daha Sizi yubileyiniz münasibəti ilə təbrik edir, şəxsi həyatınızda xoşbəxtlik, ədəbi-bədii yaradıcılığınızda uğurlar arzulayıram. Ümid edirəm ki, hələ yeni-yeni əsərlərinizlə bizi çox sevindirəcəksiniz.”
isagambar.az, 14.03.2008, Bakı