Növbəti toplantı

Bu gün Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.

Partiyadaxili məsələ bölümündə Müsavat Qadınlar Təşkilatının ümumi yığıncağına hazırlığın gedişatı haqqında məlumat verilib.

M. Ə. Rəsulzadənin 125 illik yubiley tədbirlərinin keçirilməsi üzrə Təşkilat Komitəsi yaradılıb və müvafiq qərarlar qəbul edilib.

QAT sədri Akif Nağının “Yeni Müsavat” qəzetinin köşə yazarı, tanınmış jurnalist Zamin Hacıya qarşı zorakılıq etməsi kəskin şəkildə qınanılıb, bu, azad sözə və jurnalist azadlığına qəsd kimi qiymətləndirilib. Qeyd edilib ki, Akif Nağının əməlinin yekdil ictimai qınağa məruz qalması müsbət haldır, bu, cəmiyyətin mətbuata, tənqidə dözümlü və sayğı ilə yanaşmasına təsir edəcək.

Gündəliyin ictimai-siyasi vəziyyətə dair bölümündə müxalifətin əməkdaşlığı ilə bağlı məsləhətləşmələrin gedişi müzakirə edilib.

Divan Güneyli xanım jurnalist Şahnaz Qulaminin həbs edilməsinə də münasibət bildirib. Qeyd edilib ki, Şahnaz Qulami milli-azadlıq hərəkatının fəallarından olan Qulamrza, Kərim və Cəfər Əmanilərin müəmmalı avtomobil qəzası nəticəsində həlak olmalarını araşdırmış və bunu ETTELAAT-ın keçirdiyi əməliyyat olduğunu bildirmişdi. O da qeyd olunub ki, Güneyli soydaşlarımızın hüquqularını qoruduğu üçün Şahnaz xanım bundan əvvəl də 5 il həbsdə yatıb. Divan İranda soydaşlarımıza qarşı aparılan repressiyaları qətiyyətlə pisləyib və Şahnaz xanımla birlikdə siyasi əqidəsinə görə həbsə atılmış digər soydaşlarımızın azad olunmasını tələb edib.

Yığıncağın sonunda cari məsələlərə baxılıb.

isagambar.az, 15 dekabr 2008-ci il, Bakı