Müsavat Partiyasının bəyanatı

Bu günlərdə ABŞ Dövlət Departamentinin Azərbaycanda demokratiya və insan haqlarının vəziyyəti ilə bağlı illik hesabatı yayılıb. Hesabatda demokratik dəyərlər və insan haqları sahəsində Azərbaycanda ciddi xarakter daşıyan geriyə doğru addımların olduğu vurğulanır. Bu kontekstdə söz, mətbuat, sərbəst toplaşma, siyasi fəaliyyət azadlıqlarının ciddi şəkildə məhdudlaşdırılması, siyasi məhbusların, işgəncələrin mövcudluğu, müxalifət partiyaları üzvlərinin siyasi mənsubiyyətinə görə, müstəqil KİV mənsublarının baxış və yazılarına görə təqib olunması və birbaşa digər məqamlar pislənilir.

Azərbaycan hakimiyyət orqanları bu tənqiddən lazımi nəticələr çıxarmaq əvəzinə, məlum hesabatın ciddi tənqid atəşinə tutulması xəttini götürüb. Belə ki, KİV-də müxtəlif ranqlı rəsmilərin dili ilə bu hesabat pislənilir, onu hazırlayanların hətta təsir altında hərəkət etdikləri iddia edilir. Belə bir ciddi sənədə Azərbaycan hakimiyyətinin qərəzli münasibəti ölkənin beynəlxalq imicinə ciddi zərbə vurmaqla yanaşı Azərbaycanla ABŞ arasındakı münasibətlərə xələl gətirir.

Müsavat Partiyası hesab edir ki, ABŞ Dövlət Departamentinin bu hesabatı ölkədəki ictimai-siyasi vəziyyətin real mənzərəsini yaratmaqla ölkədə hər gün bir az da pisləşməkdə olan vəziyyəti obyektiv əks etdirir. “Azadlıq” qəzetinin müxbiri Aqil Xəlilə sui-qəsd, tanınmış vəkil, Müsavat Partiyası Divanının üzvü Osman Kazımova sui-qəsd cəhdi, Milli Demokratiya İnstitutunun Gəncədə Müsavat şəhər təşkilatı ilə birgə keçirməyi planlaşdırdığı tədbirə icazə verilməməsi və bu qəbildən olan çoxsaylı misallar ölkədə demokratiya və insan haqlarının bərbad vəziyyətdə olduğunu, hakimiyyətin seçki ərəfəsində repressiv metodla əhalini xof və qorxu içərisində saxlamağa çalışdığını nümayiş etdirir.

isagambar.az, 17.03.08, Bakı