Növbəti toplantı

Bu gün Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub. Toplantının əvvəlində Milli Dirçəliş günü qeyd edilib və bayram münasibəti ilə Azərbaycan xalqına təbrik ünvanlandırılıb.

Divan bu yaxınlarda Bakıda keçirilmiş enerji sammitinə münasibət bildirib. Qeyd olunub ki, neft və qaz boru kəmərləri təkcə iqtisadi deyil, eyni zamanda ciddi strateji siyasi əhəmiyyətə malikdir. Odur ki, bu sammitdə Nabukko, Odessa-Brodı və digər neft və qaz kəmərləri layihələrinin dəstəklənməsi ölkəmizin həm iqtisadi maraqlarına cavab verən, həm də Azərbaycanın Avro-atlantik məkana inteqrasiyasına xidmət edən addım kimi müsbət qiymətləndirilib.

Ermənistan-Azərbaycan münaqişəsinin həlli ilə bağlı Madrid prinsiplərinin mətbuatda dərc edilməsi və Moskva bəyannaməsindən sonra danışıqlar prosesində intensivlik müşahidə edilməsi haqqında ciddi fikir mübadiləsi aparılıb. Divan iqtidardan danışıqların indiki mərhələsi haqqında cəmiyyətə bitkin məlumat verməsini tələb və Müsavat Deputat Qrupuna həvalə edib ki, Xarici İşlər Nazirliyinin bu məsələ ilə bağlı Milli Məclisdə məlumat verilməsi haqqında məsələ qaldırsın.
Müxalifətin əməkdaşlıq perspektivləri və formaları haqqında fikir mübadiləsi aparılıb, qərara alınıb ki, Divan bu yöndə səylərini davam etdirsin.

Yığıncağın sonunda Divan həbsdə olan jurnalist Eynulla Fətullayevi beynəlxalq “PEN klub”a üzv seçilməsi münasibəti ilə təbrik edib.

Axırda bir sıra cari məsələlərə baxılıb.

isagambar.az, 17 noyabr 2008-ci il, Bakı