Müsavat Partiyasının

b ə y a n a t ı

Son günlər Yeni Azərbaycan Partiyasının rəhbərliyinə daxil olan şəxslər ölkədə bir şəxsin dalbadal iki dəfədən artıq prezident seçilməsini qadağan edən konstitusiya maddəsinin dəyişdirilməsi ilə bağlı təkliflər irəli sürüblər. Artıq parlamentin son iclasında sözügedən partiyanı təmsil edən deputatlar tezliklə həmin məsələ ilə bağlı referendum keçirilməsini təklif ediblər. Bu təklifin xeyli sayda iqtidar deputatları tərəfindən dəstəklənməsi, parlament rəhbərliyinin təklifi tezliklə müvafiq komissiyalarda müzakirə edib növbəti iclasın gündəliyinə çıxarılması ilə bağlı fikirləri sübut edir ki, əslində göstəriş ən yuxarı səviyyədə verilib və bu antidemokratik təklif tezliklə referenduma çıxarılacaq.

Göründüyü kimi iqtidar ölkədə monarxiya qurulması istiqamətində növbəti biabırçı addım atmağa hazırlaşır və bu addımın gerçəkləşməsi ölkəni tam fəlakətə sürükləyəcək, onun olan-qalan beynəlxalq nüfuzuna sarsıdıcı zərbə vuracaq. Sözdə demokratiya quruculuğundan, ölkənin Avro-Atlantik məkana inteqrasiyasından dəm vuran hakimiyyət bu hərəkəti ilə bir daha özünün əsl simasını növbəti dəfə açıb göstərdi.

Müsavat Partiyası İlham Əliyev və onun ətrafının bu cür addımlarını ölkənin geriyə - feodalizm dövrünün qayda-qanunları ilə idarə edilməsinə sürüklənməsinə yönələn biabırçı bir fakt kimi qiymətləndirir və onu qətiyyətlə pisləyir. Biz bütün nüfuzlu beynəlxalq təşkilatları, Azərbaycanda həqiqi demokratik cəmiyyət quruculuğunu istəyən mərkəzləri Əliyev rejiminə qarşı indiyə kimi sərgilədikləri loyal münasibətin fəsadlarını obyektiv qiymətləndirməyə və əllərində olan bütün təsir mexanizmlərindən istifadə edərək ölkədə demokratiyanın birdəfəlik dəfn olunmasına yol verməməyə çağırırıq. Biz ölkədə fəaliyyət göstərən bütün müxalifət qüvvələrinə, ictimai-siyasi təşkilatlara, ziyalılara, bütövlükdə Azərbaycan xalqına müraciət edərək onları bu müdhiş planın həyata keçirilməsinə qarşı birgə mübarizə aparmağa çağırırıq.

isagambar.az, 17 dekabr 2008-ci il, Bakı