Növbəti toplantı

Bu gün Müsavat Partiyası Divanının növbəti toplantısı keçirilib. Müsavat Partiyasının Xocalı faciəsinin ildönümü ilə bağlı “Azadlıq” meydanında bütün siyasi qüvvələrin birgə mitinq keçirməsi təklifinin iqtidar partiyası YAP tərəfindən qəbul edilməməsi təəssüflə qarşılanıb və milli həmrəyliyə zidd mövqe kimi qiymətləndirilib.

Müsavat Partiyası bu məsələdə milli həmrəyliyi zəruri hesab edən siyasi qüvvələrə fevralın 26-da Xocalı abidəsinin birgə ziyarət edilməsini təklif edir.

Cümhuriyyətin 90 illiyi ilə bağlı BMM_də keçirilmiş Dəyirmi Masa haqqında fikir mübadiləsi aparılıb və tədbirin uğurlu keçdiyi qeyd olunub. Ölkə başçısının AXC-nin 90 illik yubileyinin qeyd olunması haqqında sərəncamı müsbət dəyərləndirilməklə yanaşı, bu məsələdə mütəxəssislərin, gənclərin, siyasi partiyaların, bütövlükdə cəmiyyətin prinsipial mövqeyinin həlledici rol oynadığı qeyd olunub.
Divan verilmiş sərəncamın kağız üzərində qalmamasını onun bütövlükdə yerinə yetirilməsini vacib saymaqla yanaşı, həm də BDU-ya M. Ə. Rəsulzadənin, Milli Konservatoriyaya isə Üzeyir Hacıbəylinin adının qaytarılmasını tələb edir.

Gündəliyin partiyadaxili məsələlərə aid bölümündə Səbail və Dəvəçi rt-larının keçirilmiş hesabat-seçki konfransları haqqında məlumat dinlənilib.

Gündəlikdəki ictimai-siyasi vəziyyətə dair məsələnin müzakirəsi zamanı əsas diqqət Kosovanın müstəqilliyinin bəyan edilməsi məsələsinə yönəlib. Divan belə hesab edir ki, Azərbaycan iqtidarı qərar verməyə tələsməməlidir, bu məsələni ciddi araşdırmalı və prosesləri izləməlidir.

Axırda bir sıra cari məsələlərə baxılıb.

isagambar.az, 18 fevral 2008-ci il, Bakı