Növbəti toplantı

Bu gün Müsavat Partiyası Divanının növbəti toplantısı keçirilib. Gündəlik qərarların icrası, partiyadaxili və ictimai-siyasi vəziyyətə dair məsələlərdən ibarət olub. Əvvəlcə Azərbaycan Xalq Cümhuriyyətinin 90 illiyinə həsr olunmuş açıq şahmat turnirinə hazırlıq haqqında məlumat dinlənilib. Daha sonra Bakı şəhəri İH-nın Müsavat Partiyasının 18.05.2008-ci il tarixinə təyin etdiyi mitinqə razılıq verməməsi və ümumiyyətlə kütləvi aksiyaların keçirilməsi ilə bağlı yaranmış vəziyyət müzakirə olunub. Qərara alınıb ki, Bakı şəhəri İH-nin bu növbəti qanunsuz qərarından da məhkəməyə müraciət edilsin. Eyni zamanda partiya strukturlarında razılaşdırılmamış aksiyalar barədə fikir mübadiləsinə başlamaq qərara alınıb. İndi cəmiyyətin gündəliyində olan Seçki Məcəlləsinə və Sərbəst Toplaşmaq Azadlığı Haqqında Qanuna edilməsi gözlənilən dəyişikliklər haqqında geniş fikir mübadiləsi aparılıb. Bu istiqamətdə demokratik düşərgənin ortaq mövqeyinin formalaşdırılması istiqamətində səyləri davam etdirmək zəruri hesab olunub. Payızda keçiriləcək prezident seçkilərinin azad və ədalətli keçirilməyəcəyi ciddi müzakirə olunduğu bir dövrdə Seçki Monitorinq Mərkəzinin qeydiyyatının ləğv edilməsi, hakimiyyətin seçkidə aşkarlığın olmaması üçün çalışmasının göstəricisi kimi dəyərləndirilib və bu qanunsuz qərarın ləğv edilməsi tələb edilib.
Divan irimiqyaslı beynəlxalq yarışların qalibləri, məşhur boksçular – Ramal Amanova və Vüqar Ələkbərova DİN Baş Mütəşəkkil Cinayətkarlıqla Mübarizə İdarəsində dəhşətli işgəncə verilməsini qətiyyətlə pisləyib. Azərbaycanın işgəncələrə qarşı Beynəlxalq Konvensiyaya qoşulmasına və bu sahədə Avropa Şurası qarşısında konkret öhdəliklər götürməsinə baxmayaraq belə halların hələ də baş verməsinə görə birbaşa iqtidarın məsuliyyət daşıdığı bildirilib.

Yığıncağın sonunda bir sıra cari məsələlərə baxılıb.

isagambar.az, 19 may 2008-ci il, Bakı