Növbəti toplantı

Bu gün Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili, 15 Oktyabr prezident seçkilərinin nəticələri və ictimai-siyasi vəziyyətə dair məsələlərdən ibarət olub. Gündəliyin görülən işlərə aid bölümündə Milli Müstəqillik Günü münasibəti ilə Milli-Azadlıq Hərəkatının lideri Əbülfəz Elçibəyin Fəxri Xiyabandakı qəbrinin və İstiqlal Şəhidləri uyuyan Şəhidlər Xiyabanının ziyarət edilməsi haqqında məlumat verilib. Əsas müzakirə olunan məsələ oktyabrın 15-də keçirilmiş prezident seçkiləri haqqında olub. Respublika üzrə seçmə üsulla müşahidə aparılmış 150 məntəqə üzrə müşahidənin nəticələrinə baxılıb. Həmin məlumatlara əsasən aydın olub ki, bu dəfəki seçkilər də total şəkildə saxtalaşdırılıb. Seçicilərin məntəqələrə məcburi şəkildə və “karusel” üsulu ilə gətirilməsinə baxmayaraq, onların sayı o qədər də çox olmayıb və bunu Mn SK-lardan alınmış rəsmi protokollar da təsdiq edir. Bundan narahat olan iqtidar MSK-nın internet saytında seçki məntəqələri üzrə rəsmi protokollarda göstərilmiş məlumatları ciddi şəkildə şişirdib. Qərara alınıb ki, aparılmış müşahidələrin nəticələri və aşkar edilmiş saxtakarlıqlar ümumiləşdirilərək vahid sənəd halına salınsın.

Müxalifətin Əməkdaşlıq Mərkəzində birgə fəaliyyət göstərmək niyyətində olan partiyaların seçkiyəqədərki fəaliyyəti, xüsusən seçkinin qiymətləndirilməsi ilə bağlı ilkin rəy haqqında fikir mübadiləsi aparılaraq, ona yüksək qiymət verilib. Seçkilərdən sonrakı dövrdə əməkdaşlığın davam etdirilməsi və daha da dərinləşdirilməsi haqqında təkliflər səsləndirilib.

Axırda bir sıra cari məsələlərə baxılıb.

isagambar.az, 20 oktyabr 2008-ci il, Bakı