“PREZİDENT SEÇKİSİ ALMANİYADA ƏTRAFLI MÜZAKİRƏ OLUNDU”
İsa Qəmbər xarici səfərdən qayıtdı

“Fridrix Naumann” Fondunun və Amerikanın Marşal Fondunun dəvəti ilə Almaniyada səfərdə olan Müsavat Partiyasının başqanı İsa Qəmbər vətənə dönüb. Dünən səfər barədə qəzetimizə açıqlama verən Müsavat başqanı bildirdi ki, Almaniyada olduğu müddətdə iki nüfuzlu təşkilat və bu ölkənin bəzi digər çox önəmli araşdırma mərkəzləri bir neçə maraqlı mövzularda konfranslar və seminarlar keçirib.
həmin tədbirlərin iştirakçısı olan İsa Qəmbər Cənubi Qafqazın xüsusi diqqət mərkəzində olduğunu vurğuladı. Müsavat başqanının sözlərinə görə, bu ölkələrdə və ümumiyyətlə, postsovet məkanında avtoritarizm meylləri ilə demokratikləşmə arasındakı mübarizə mövzusu diqqət mərkəzində olub:

“Dünyadakı müxtəlif qüvvələrin Cənubi Qafqazla bağlı geopolitik maraqları, Cənubi Qafqazın təhlükəsizlik problemlərinin həlli məsələsi də diqqət mərkəzindəydi. Eyni zamanda Avropanın enerji təminatında Azərbaycanın rolu mövzusu da var idi”. Müsavat başqanı hər üç mövzuda məruzə ilə çıxış edib: “Tədbirlərdə Gürcüstan və Ermənistanın təmsilçiləri var idi. Həmçinin Amerika, Rusiya, Türkiyədə araşdırmaçılar, siyasətçilər iştirak edirdi. Eyni zamanda Almaniyanın bir çox təmsilçiləri də bu konfranslara qatılmışdılar. Çox maraqlı, səmərəli müzakirələrimiz oldu”.

Müsavat başqanı səfər çərçivəsində adı çəkilən ölkələrin araşdırmaçıları, müxtəlif siyasi nümayəndələri ilə bir sıra fərdi söhbətlərinin olduğunu, maraqlı və diqqətəlayiq görüşlər keçirdiyini də vurğuladı:

“Bütövlükdə ətrafında disskusiya aparılan mövzuları və görüşləri qiymətləndirsək, Avropada Cənubi Qafqaz ölkələrinə diqqətin xeyli artdığını bir daha təsdiq etmək mümkündür. Xüsusən də Gürcüstan və Ermənistanda son vaxtlar keçirilən prezident seçkiləri və bu seçkilər zamanı yaşanan hadisələr, Azərbaycanda isə prezident seçkilərinin yaxınlaşması və bu ərəfədə ölkədə demokratiya və insan haqları ilə bağlı çox ciddi problemlərin mövcudluğu kifayət qədər ətraflı şəkildə müzakirə olundu və diqqət mərkəzində oldu”.

Elşad PAŞASOY, Yeni Müsavat, 22.04.2008