SOYQIRIMINDAN 16 İL KEÇDİ
Minlərlə insan faciə qurbanlarını yad etdi

Dünən Xocalı qətliamından 16 il ötdü. 1992-ci il fevralın 25-dən 26-na keçən gecə erməni silahlı dəstələri Xankəndində yerləşdirilmiş 366-cı Motoatıcı Alayının zirehli texnikası və hərbi heyətinin dəstəyi ilə Xocalı şəhərinə hücum edib. Qeyd edək ki, Xocalıya hücumdan əvvəl fevralın 25-i axşamdan etibarən şəhər toplardan və ağır zirehli texnikadan şiddətli atəşə tutulub. Şəhərin müdafiə sistemini dağıdan düşmən gecə yarısı Xocalıya girib. Ermənilərin hücumunu görən şəhər əhalisinin bir qismi Ağdam istiqamətində qaçmağa çalışsa da, şəhər ətrafında gizlənən erməni silahlıları dinc insanları qətlə yetirib. Qırğın nəticəsində 613 nəfər həlak olub.

Onlardan 63 uşaq, 106 qadın, 70 isə yaşlılardır. Bundan başqa, 8 ailə tamamilə məhv edilib. Həmçinin erməni silahlılarının Xocalıya hücumu nəticəsində 487 nəfər yaralanıb. Ermənilər 1275 nəfəri əsir götürüb. Hücum zamanı 150 nəfər itkin düşüb.

Dünən səhər saatlarından etibarən Xocalı soyqırımı xatirəsinə ucaldılmış "Ana fəryadı" heykəlini minlərlə insan ziyarət edib. Minlərlə Azərbaycan vətəndaşı bir daha erməni vəhşiliyini lənətləyib və şəhidlərimizin ruhuna dualar oxuyublar. İlk olaraq dövlət başçısı İlham Əliyev və hökumət nümayəndələri "Ana fəryadı" heykəlini ziyarət ediblər. Xocalı soyqırımının anım mərasiminə ölkənin aparıcı siyasi partiyaları və ictimai təşkilatları da qatılıb. Müsavat Partiyasının başqanı və yüzlərlə müsavatçı "Ana fəryadı" heykəlinin önünə toplaşıb. Müsavat başqanı heykəlin önünə xatirə çələngi qoyub. Anım mərasimində çıxış edən Müsavat başqanı İsa Qəmbər Xocalı soyqırımını bəşəriyyət tarixinin ən qanlı cinayətlərindən biri olduğunu bildirdi.
İ.Qəmbər törədilmiş cinayətlərin dünya ictimaiyyətinə çatdırılması və soyqırım qurbanlarının xatirələrinin əbədiləşdirilməsi istiqamətində hakimiyyətin üzərinə düşən işləri yerinə yetirmədiyini qeyd etdi. Anım mərasimində çıxış edən Qarabağ Azadlıq Təşkilatının sədri Akif Nağı Xocalıda axıdılan qanların qisasının alınacağını dedi. Xocalı soyqırımının anım mərasiminə "Azadlıq" blokuna daxil olan partiyalar, Klassik Azərbaycan Xalq Cəbhəsi Partiyası, ADP və digər müxalif qüvvələr də iştirak edib. Qeyd edək ki, dünən saat 17:00-da ölkə ərazisində Xocalı soyqırımının qurbanlarının xatirəsi bir dəqiqəlik sükutla yad edilib.
Xocalı qurbanları xaricdə də anılıb

Dünyanın bir çox ölkələrində də Xocalı faciəsinə həsr edilmiş tədbirlər həyata keçirilib. Avropada yaşayan siyasi mühacirlərin təşkil etdiyi aksiyalardan biri İsveçrənin paytaxtı Cenevrədə keçirilib. Bu barədə redaksiyamıza məlumat verən siyasi mühacir, iqtisadi inkişaf nazirinin sabiq müşaviri Şahverdi Əsədov aksiyanın Ermənistanın İsveçrədəki səfirliyi qarşısında baş tutduğunu bildirib. Azərbaycanlıların İsveçrə Mədəniyyət Mərkəzinin təşəbbüsü ilə keçirilən aksiyada Xocalıda qətlə yetirilən insanların fotoşəkilləri nümayiş etdirilib. Aksiya zamanı xüsusi səsgücləndirici vasitəsi ilə 613 dəfə həyəcan zəngi çalınıb və Xocalı soyqırımında həlak olan şəhidlərin sayı qədər - 613 şam yandırılıb. Aksiya iştirakçıları yerli sakinlərə Xocalı faciəsindən bəhs edən 500-dən artıq buklet paylayıb.

İsveçdə yaşayan mühacirlər paytaxt Stokholmda Xocalı faciəsinin ildönümü ilə bağlı nümayiş keçirib. Bu barədə qəzetimizə məlumat verən Hikmət Rzasoy Stokholmda Xocalı faciəsinə həsr edilmiş abidənin qoyulması istiqamətində işlərə başladıqlarını bildirib.

Xaricdə Yaşayan Azərbaycanlılarla İş üzrə Dövlət Komitəsinin məlumatına görə, Xocalı faciəsi Kanada, Danimarka, Türkiyə, Birləşmiş Ərəb Əmirliyində və digər ölkələrdə də yad edilib.

Dünən qardaş Tükiyənin bir çox şəhərlərində də Xocalı soyqırımının anım mərasimləri keçirilib.

Əfqan MUXTARLI, Yeni Müsavat, 27.02.2007