T ə b r i k
Hörmətli həmvətənlərim!
31 dekabr Dünya Azərbaycanlılarının Həmrəylik günü və Yeni il münasibətilə
hamınızı təbrik edir, üzümüzə gələn 2009-cu ilin xalqımız üçün uğurlu olmasını
arzulayıram.
Azərbaycanın müstəqilliyi və azadlığı uğrunda apardığımız ümummilli hərəkatın
dalğasında 31 dekabr 1989-cu ildə cənublu soydaşlarımızla uzun onilliklər bizi
ayıran tikanlı məftillərin sökülməsi həmin günü təqvimimizin ən əziz
bayramlarından birinə çevirib. İndi 31 dekabr təkcə Quzeydə və Güneydə yox,
bütün dünyada yaşayan Azərbaycanlıların həmrəylik günü kimi qeyd edilir. Bu
illər ərzində dünyanın müxtəlif yerlərində yaşayan Azərbaycanlıların
təşkilatlanması, toparlanması, ümumi Azərbaycan idealı naminə birgə fəaliyyət
göstərməsi sahəsində xeyli işlər görülüb. Əlbəttə, görülən işlərlə fəxr etməyə
dəyər. Amma nəzərə alsaq ki, hələ də xalqımızın, onun ayrı-ayrı nümayəndələrinin
potensialından tam mənada istifadə edə bilmirik, onda bu sahədə hələ xeyli
görüləsi işlərin də olduğunu unutmamalıyıq.
Qarşıdan həm də Yeni İl bayramı gəlir. Təəssüf ki, yola saldığımız ilin
yekunlarını təhlil edərkən o qədər də ürəkaçan mənzərənin şahidi olmuruq.
!993-cü ildən bəri ölkəni idarə edən Əliyevlər rejiminin səriştəsiz və xalqa
zidd siyasəti nəticəsində bu il də itirilmiş illərin sırasına daxil oldu. Bütün
sahələrdə ölkəni bürüyən aşır böhran daha da dərinləşdi. Azərbaycanın bir
nömrəli problemi olan Ermənistan-Azərbaycan münaqişəsinin həlli istiqamətində
heç bir irəliləyiş baş vermədi. Xalqı iqtisadi güzəranı daha da ağırlaşdı,
cəmiyyətdə təbəqələşmə bir az da dərinləşdi, insan hüquqları və digər azadlıqlar
sahəsində yaranmış acınacaqlı vəziyyət dözülməz həddə çatdı. Bütün bunlar azmış
kimi ilin sonunda xalqımız daha bir xoşagəlməz sürprizlə üzləşdi. Ölkəni fəlakət
həddinə gətirib çıxarmış hakim rejim acış-aşkar Konstitusiya çevrilişi edərək öz
hakimiyyətini əbədiləşdirmək istəyir. Mədəni, inkişaf səviyyəsinə görə bütün
Yaxın Şərqdə ən üstün mövqelərə malik bir ölkəni orta əsrlərin cəhalətinə
sürükləmək istəyirlər. Bu gün vətəndaşları faktiki olaraq seçmək və seçilmək
hüququndan məhrum edilmiş bir məmləkətdə bunları gerçəkləşdirmək o qədər də
çətin deyil. Sadəcə olaraq, biz bir millət, toplum olaraq məsuliyyətimizi dərk
etməli, ölkəni bu qaranlıq perspektivdən xilas etməliyik. Odur ki, üzümüzə gələn
Yeni ildə birlik nümayiş etdirərək ümummilli amallar uğrunda bir nöqtəyə
vurmalı, demokratik Azərbaycan dövlətinin qurulması yolundakı maneələri aradan
qaldırmaq üçün maksimum fəallıq nümayiş etdirməliyik.
Hörmətli soydaşlarım!
Bir daha bayramınızı təbrik edir, hamınızı xoşbəxt gələcəyimiz naminə sözün əsl
mənasında birliyə, həmrəyliyə çağırıram.
Tanrı Azərbaycanımızı qorusun!
Hörmətlə,
İsa Qəmbər,
Müsavat Partiyasının Başqanı
isagambar.az, 28 dekabr 2008-ci il, Bakı