Avropa Parlamentinin nümayəndə heyəti ilə görüş

Bu gün Müsavat Partiyasının qərargahında Avropa Parlamentinin Azərbaycanda səfərdə olan nümayəndə heyəti ilə Müsavat Partiyasının rəhbərliyi arasında görüş keçirilib. Müsavat Partiyasının Başqanı İsa Qəmbər qonaqları salamladıqdan sonra tərəflər arasında Azərbaycanda və regiondakı son ictimai-siyasi durumla bağlı ətraflı fikir mübadiləsi olub. Nümayəndə heyətinin başçısı Qraham Vatson səfərlərinin məqsədi, Cənubi Qafqaz regionunda yaranmış yeni siyasi situasiya ilə bağlı Avropa Parlamentinin mövqeyi və gördüyü işlərlə bağlı məlumat verib. Qeyd edib ki, Cənubi Qafqaz olduqca həssas bir bölgədir və burada meydana çıxan istənilən konfliktin və fikir ayrılıqlarının diplomatik yolla, bütün maraqlı tərəflərin dialoqu ilə həll etmək lazımdır. Müsavat Partiyasının Başqanı İsa Qəmbər sözügedən konfliktlə bağlı partiyanın mövqeyini qonaqlara çatdırıb. İsa Qəmbər deyib ki, Cənubi Qafqazın demokratikləşməsi və Avroatlantik məkana inteqrasiyasının sürətlənməsi buradakı sabitliyin və tərəqqinin başlıca şərtidir. “Nə qədər ki, Qərbin siyasi mərkəzlərində regiona münasibətdə müəyyənləşmiş prioritetlər arasında demokratiya təhlükəsizlik və enerji maraqlarından sonra gələcək, o vaxtadək təhlükəsizlik və enerji maraqlarının özü təhlükə altına düşəcək” - deyə o bildirib.

Sonra Ermənistan-Azərbaycan münaqişəsi və onun həlli yolları, Azərbaycandakı prezident seçkiləri və Müsavat Partiyasının bu seçkilərdə iştirakdan imtina etməsi və seçkisonrası dövr ilə bağlı fikir mübadiləsi aparılıb.

29.09.2008, isagambar.az. Bakı