Müsavat Partiyasının
b ə y a n a t ı

Təhsil Haqqında Qanun layihəsi ikinci oxunuşda Milli Məclisin müzakirəsinə qəbul olunub. Boloniya sisteminə keçid prinsipləri üzərində qurulmuş layihə bir sıra müsbət tərəflərinə baxmayaraq, hələ də keçmiş sovet avtoritar təhsil sisteminin bir sıra mənfi xüsusiyyətlərini özündə saxlayır. Bu hər şeydən əvvəl təhsilin idarə edilməsi ilə bağlı məsələlərə aiddir. Belə ki, layihədə Təhsil Nazirliyinin rolu və funksiyaları həddən artıq şişirdilməklə təhsil müəssisələrinin muxtariyyəti məsələsi yenə də söz olaraq qalır. Layihədə qeyd edildiyi kimi, ölkədə təhsilin strategiyasının müəyyənləşdirilməsi, təhsil müəssisələrinə rəhbər kadrların seçilib yerləşdirilməsi bütünlüklə Təhsil Hazirliyinin tabeçiliyində saxlanılır. Halbuki Boloniya sistemi təhsil müəssisələri üçün geniş muxtariyyatı nəzərdə tutur, burada təhsil müəssisələrinin rəhbərləri kollektivin özü tərəfindən seçilir. Layihədə Boloniya sisteminə uyğun olaraq ali təhsilin 3 mərhələli sistemi öz əksini tapsa da, sovet dövrünün ənənələrinə uyğun olaraq doktorantura pilləsində yenə də iki pilləlik saxlanılır. Bu isə faktik olaraq ali təhsil müəssisələrində elmi tədqiqat işlərinin dünya standartları səviyyəsində qurulmasında ciddi maneçilik yaradır. Ali məktəblərə qəbulda test sisteminin saxlanılması müsbət hadisə olsa da, bu imtahanlarla bağlı bəzi millət vəkillərinin verdiyi şərhlər, məsələn test imtahanından sonra ali məktəblərdə abutiruyentlərlə xüsusi söhbətlərin keçirilməsindən sonra onların qəbul edilməsinin zəruriliyi barədə iddiaların irəli sürülməsi, mövcud yerləşdirmə prinsipinin dəyişdirilməsi barədə çağırışlar, bu barədə qanunda birmənalı müddəanın olmaması ciddi narahatlıq oyadır. Biz hesab edirik ki, tələbə qəbulundakı mövcud sistem reallıqlara uyğundur. Təhsilin maliyyələşdirilməsi, təhsil işçilərinin əmək haqları barədə müddəaların heç olmasa ümumi şəkildə layihədə yer almaması da ciddi nöqsanlar sırasına aid edilməlidir.

Müsavat Partiyası belə hesab edir ki, təhsil və ona qayğı ölkənin əsas prioritet sahəsi olmalı, bu sahədə mövcud olan nöqsanların aradan qaldırılması və Azərbaycan təhsilinin dünya standartları səviyyəsinə qaldırılması üçün qanunlarla yanaşı, bu qanunların praktikada ardıcıl surətdə tətbiq edilməsi üçün də təxirəsalınmaz tədbirlər görülməlidir.

isagambar.az, 29 dekabr 2008-ci il, Bakı