Növbəti toplantı

Bu gün Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.

Gündəliyin görülən işlər bölməsində İsa Qəmbər Cənubi Qafqazla Avropa Birliyi və NATO arasında əməkdaşlığın durumu barədə tədbirlərdə iştirak etmək üçün getdiyi Brüssel səfəri haqqında ətraflı məlumat verdi.

İctimai-siyasi vəziyyətə dair məsələnin müzakirəsi zamanı diqqət mərkəzində prezident seçkiləri ərəfəsində ölkədəki vəziyyət olub. AŞ PA-nın yay sessiyasının Azərbaycanla bağlı qəbul etdiyi qətnamə haqqında geniş fikir mübadiləsi aparılıb.

Bakı şəhərində aparılan söküntü işləri və bunun nəticəsində yaranan sosial narazılıqlar müzakirə olunub. Qeyd edilib ki, əksər hallarda mülkiyyət sahiblərinə ya heç bir təminat ödənilmir, ya da ödənilmiş təminat sökülən mülkiyyətin dəyərinə adekvat olmur. “Elmlər Akademiyası” metrostansiyası yanındakı “alimlər evi” kimi tanınan yaşayış binasının “qəzalı vəziyyət” adı altında sökülməsinə cəhd edilməsi və bunun müqabilində sakinlərə adekvat təminat ödənilməməsi ciddi narazılıqla qarşılanıb və bu məsələ ilə bağlı Divan adından bəyanat qəbul edilib.

Divan son vaxtlar İranda insan haqlarının daha da kobud pozulmasına və siyasi qətllərin artmasına diqqət çəkərək bundan narahat olduğunu bildirib və qanunsuzluqların dayandırılmasını tələb edib.

Axırda bir sıra cari məsələlərə baxılıb.

isagambar.az, 30 iyun 2008-ci il, Bakı