Müsavat Partiyasının son günlər Naxçıvanda baş verən repressiyalara etiraz bildirən bəyanatı

“Naxçıvanda başqa cür düşünənlərə qarşı repressiyalar davam edir. İyunun 25-də Açıq Cəmiyyət Partiyasının Naxçıvan təşkilatının üzvü Niyazi Qasımov naməlum şəxslər tərəfindən başına torba keçirilərək zorla maşına əyləşdirilib və Naxçıvandan 8-10 km aralıda, Duzlaq deyilən bir yerdə ölümlə təhdid edilmiş, möhkəm döyülmüş və ciddi bədən xəsarətləri yetirilmişdir.

Bu gün isə Naxçıvan polisi AXCP fəalı Fərid Əliyevi saxlayaraq Kələkiyə, Ə. Elçibəyin ad günü mərasiminə getdiyi üçün onu hədələmişdir.
Bütün bunlar onu göstərir ki, Naxçıvanda repressiv rejim öz bəd əməllərini davam etdirməkdə və Naxçıvanın başqa cür düşünən tanınmış adamlarını zorakı üsullarla susdurmağa çalışmaqdadır.

Müsavat Partiyası xalqımızı gözdən salan bu cür vəhşi hərəkətlərə qarşı etirazını bildirir və günahkar şəxslərin tapılıb dərhal cəzalandırılmasını tələb edir”.

isagambar.az, 01 iyul 2009-cu il, Bakı