Müsavat Partiyasının bəyanatı

Aprelin 30-da Azərbaycan Dövlət Neft Akademiyasında qanlı terror hadisəsi baş verib. Silahlı şəxs(lər) səhər saatlarında Akademiyanın 2-ci korpusuna daxil olaraq qarşısına çıxan şəxslərə atəş açıb. 13 nəfər həlak olub və onlarla insan yaralanıb. Ölənlər və yaralananlar əsasən Akademiyanın müəllim və tələbələri olub. Hadisənin sifarişçisi, təşkilatçısı və motivi barəsində hələlik heç bir rəsmi açıqlama verilməyib.

Müsavat Partiyasının Məclisi bu qanlı terror hadisəsini qətiyyətlə pisləyir və hakimiyyətdən tələb edir ki, qısa müddət ərzində hadisənin səbəbləri barədə ictimaiyyətə məlumat versin. Partiya habelə bu qanlı olayda əli olan digər şəxslər varsa, dərhal tapılaraq cəzalandırılmasını tələb edir.

Müsavat Partiyasının Məclisi Azərbaycan gənclərinin, tələbələrin son günlər keçirdiyi aksiyaları, irəli sürdüyü tələbləri dəstəkləyir və gənclərlə tam həmrəyliyini bildirir.
Biz, terror hadisəsi nəticəsində həlak olan şəxslərin ailə üzvlərinə, yaxınlarına, Akademiyanın kollektivinə, eləcə də bütövlükdə Azərbaycan xalqına dərin hüznlə başsağlığı verir, həlak olanlara ulu Tanrıdan rəhmət diləyir, yaralananlara isə şəfa arzulayırıq.

isagambar.az, 02 may 2009-cu il, Bakı