Növbəti toplantı

Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili, ictimai-siyasi vəziyyətə dair məsələlərdən ibarət olub.

Əvvəlcə Mayın 28-də Respublika Günü ilə bağlı Novxanı qəsəbəsində keçirilmiş tədbir haqqında məlumat verilib.

10 iyun 2009-cu il tarixdə “Məhəmməd Əmin Rəsulzadə və təhsil” mövzusunda konfrans keçirilməsi haqqında qərar qəbul edilib.

Güney Azərbaycanda yaşayan soydaşlarımızın hüquqlarının tapdanması və İran Silahlı Qüvvələrinin Baş Qərargahı rəisinin ölkəmiz haqqında həqarətə yol verməsi, onu təhdid etməsinə etiraz olaraq 02 iyun 2009-cu il tarixdə bu ölkənin səfirliyi qarşısında piket keçirilməsinə qərar verilib.

Orduda son zamanlar baş vermiş hadisələr, o cümlədən Qaraheybətdəki hərbi hissədə əsgərlərin kütləvi şəkildə zəhərlənməsi, digər hərbi hissələrdə əsgərlərin öz əsgərlərimiz tərəfindən öldürülməsi ciddi narahatlıq doğurub. Müsavat Partiyası iqtidardan baş verənləri obyektiv şəkildə araşdırılmasını, günahkarların cəzalandırılmasını və gələcəkdə belə halların baş verməməsi üçün ciddi tədbirlər həyata keçirməsini tələb edir.

Milli Məclisin son toplantısında baş vermiş xoşagəlməz hadisə də müzakirə olunan məsələlərin sırasında olub. Divan Milli Məclisin sədri və onun müavinləri tərəfindən müsavatçı deputatların çıxışlarına əngəllər törədilməsini, onlara qarşı nalayiq ifadələr işlədilməsini kəskin pisləyib və bunlara son verilməsi zərurəti haqqında Parlament rəhbərliyinə xəbərdarlıq edib.

01 iyun – Uşaqların Beynəlxalq Müdafiəsi günü münasibəti ilə Divan Azərbaycan uşaqlarını təbrik edib.
6 aylıq ABŞ səfərindən qayıtmış Qubad İbadoğlu bu haqda Divan üzvlərinə ətraflı məlumat verib.

Yığıncağın sonunda cari məsələlərə baxılıb.

isagambar.az, 01 iyun 2009-cu il, Bakı