Müsavat Partiyasının kənd təsərrüfatında vəziyyətlə bağlı bəyanatı

Ölkənin kənd təsərrüfatında yaranmış ağır vəziyyət hakimiyyətin aqrar siyasətində ciddi boşluqların olduğunu ortaya çıxarır. Bu, kənd təsərrüfatı məhsullarının alış qiymətləri ilə bağlı qeyri-peşəkar və etinasız münasibətlərdə özünü daha qabarıq biruzə verir. Belə ki, taxıl məhsullarının dövlət tədarükü ilə əlaqədar əvvəlcədən taxıl əkənlərə yüksək qiymətlər vəd edilsə də, bu gün keyfiyyəti bəhanə edərək yerli buğda növlərinin satın alınmasından imtina edilir. Taxılın bazar qiymətlərinə ciddi surətdə təsir göstərən bu vəziyyət istehsal edilən məhsulun maya dəyərindən də aşağı qiymətdə tələbin formalaşmasına gətirib çıxarır. Texniki vasitələrin azlığı, onların icarəsinin yüksək olması da vəziyyəti ağırlaşdırır. Nəticə etibarilə, taxıl istehsalı sahəsində gələcəkdə böhranlı bir vəziyyətin bünövrəsi indidən qoyulmuş olur.

Belə vəziyyət illərdir ki, kartof və digər tərəvəz məhsullarının istehsali və satışında da müşahidə edilməkdədir.Respublika miqyasinda kənd təsərrüfatı məhsullarının satın alınması və tədarükünün yox dərəcəsində olması bu məhsulların alışı və satışının inhisarçı dairələrin nəzarətinə keçməsi üçün şərait yaradır. Nəticədə istehsalçı diktə altında, özü də gəlirsiz işləməyə məcbur edilir.

Kənd təsərrüfatına kreditlərin ayrılmasını da qeyri-qənaətbəxş hesab etmək olar. Cüzi miqdarda ayrilan kreditlər “şapka” və digər qeyri-qanuni əməllər hesabına astarı üzündən baha başa gəlir.İnsanlar ayaqda qalmaq üçün son qəpiklərini də xərcləməyə məcbur edilirlər. Elə bu səbəbdən Azərbaycanın kənd təsərrüfatı elm tutumlu texnologiyalar və səmərəli əkinçilik mədəniyyəti yolu ilə inkişaf edə bilmir.

Müsavat Partiyası hakimiyyəti aqrar bölməyə bu cür ögey münasibətə son qoymağa, kənd əməyinə layiqincə qiymət verməyə və bu bölmədə yaranmış böhranlı vəziyyəti aradan qaldırmaq üçün təsirli tədbirlər görməyə çağırır.

isagambar.az, 06 iyul 2009-cu il, Bakı