Növbəti toplantı

Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.
Müsavat Qadınlar Təşkilatının ümumi yığıncağına hazırlıq məsələləri müzakirə edilib. Yığıncağın sentyabr ayının üçüncü ongünlüyündə keçirilməsi haqqında qərar qəbul edilib.

Yaxın bir il üçün partiyanın fəaliyyət xətti haqqında geniş müzakirələr aparılıb, cəmiyyətlə əlaqələrin daha da gücləndirilməsi yönündə təkliflər səsləndirilib.
Gündəliyin ictimai-siyasi vəziyyətə dair bölümündə ilkin olaraq son bir həftə ərzində baş vermiş İsrail prezidenti Şimon Peresin, Rusiya Federasiyası prezidenti Dmitri Medvedyevin, Polşa prezidenti Lex Kaçinskinin Bakıya və ABŞ prezidenti Barak Obamanın Moskvaya rəsmi səfərləri ətrafında geniş fikir mübadiləsi aparılıb, bu səfərlərin Azərbaycan üçün əhəmiyyəti dəyərləndirilib.

Avropa Birliyinin “Şərq tərəfdaşlığı” proqramının icrasının dayandırılması haqqında İsveçin Baş Nazirinin dedikləri ilə əlaqədar Avropa Birliyindən bu məsələyə aydınlıq gətirilməsi istənilib.

Çinin Urumçi şəhərində uyğurlarla hökumət qüvvələri arasında baş vermiş qarşıdurma haqqında fikir mübadiləsi aparılıb. Hökumətin qeyri-adekvat güc tətbiq etməsi nəticəsində yüzlərlə adamın öldürülməsi və yaralanması qətiyyətlə pislənilib, beynəlxalq təşkilatların bu ölkədə insan haqlarına əməl olunmadığını diqqətdə saxlamalı olduğu bildirirlib.

Kənd təsərrüfatı məhsullarının dövlət satınalmalarının qeyri-şəffaflığı və monopolistlərin maraqları ilə uzlaşdırılması kəskin tənqid olunub və bu barədə ayrıca bəyanat qəbul edilib (Bəyanatın mətni əlavə edilir).

İstehlakçılara verilən qazın pərakəndə satış qiymətinin iki dəfədən çox qaldırılması müzakirə edilib. Partiyanın bəyanatında bildirildiyi kimi, bunun sadə vətəndaşlara qarşı soyğunçuluq olduğu və korrupsioner məmurlar tərəfindən talanan büdcəni doldurmaq üçün düşünüldüyü qeyd edilib.

Toplantının sonunda cari məsələlərə baxılıb.

isagambar.az, 06 iyul 2009-cu il, Bakı