Təşviqat qrupu yaradılması barədə qərar

İsa Qəmbər və Müsavat Partiyasının rəhbərliyinə daxil olan digər şəxslər bir sıra başqa siyasi partiyaların, ictimai təşkilatların təmsilçiləri ilə birgə 18 mart 2009-cu il tarixdə keçiriləcək referendumda demokratik ictimaiyyətin mövqeyini təmsil etmək məqsədi ilə təşviqat qrupu yaradılması barədə qərar qəbul ediblər. Təşviqat qrupunun “Respublikaçılar” adlandırılması təklifi ilə çıxış edən təşəbbüsçülər yaxın günlərdə ilkin təşəbbüs qruplarının toplantılarını keçirməyi planlaşdırır. İlkin təşəbbüs qrupları Bakı, Sumqayıt, Gəncə şəhərlərində və ölkənin bir sıra rayonlarında yaradılacaq.

“Respublikaçılar” təşviqat qrupuna referendumla bağlı təşviqat prosesində iştirak etmək niyyətində olan siyasi və ictimai təşkilat nümayəndələrinin cəlb olunması, eyni zamanda digər müxalifət təşkilatlarının təşəbbüsü ilə yaradılacaq təşviqat qrupları ilə sıx əməkdaşlıq edilməsi nəzərdə tutulur.

“Respublikaçılar” təşviqat qrupunun təşəbbüsçüləri demokratik ictimaiyyətin vahid təşviqat qrupunun yaradılması ehtimalını da istisna etmir və bu istiqamətdəki təklifləri dəyərləndirməyə hazırdır.

isagambar.az, 07 yanvar 2009-cu il, Bakı