Müsavat Partiyasının
b ə y a n a t ı

Xəbər verildiyi kimi 07 yanvar 2009-cu il tarixdə İsrailin ölkəmizdəki səfirliyi qarşısında dindarların Fələstin hadisələrinə münasibət bildirmək məqsədilə etiraz aksiyası keçirilib. Həmin aksiyanı işıqlandırmaq üçün oraya yollanan “Yeni Müsavat” qəzetinin foto-müxbiri Əfqan Muxtarlı baş verənləri fotoaparatla çəkərkən polis əməkdaşları onunla amansız davranıblar. Belə ki, Yasamal rayon Polis İdarəsinin rəisi Möhübbət Hüseynovun göstərişi ilə bir neçə polis əməkdaşı əynində Mətbuat Şurası və DİN-in birgə hazırladığı jurnalist gödəkçəsi olmasına baxmayaraq Əfqan Muxtarlıya yaxınlaşaraq ondan çəkilişi dayandırmasını tələb ediblər. Buna etiraz etdikdə polis rəisinin göstərişi ilə polislər zorla fotoaparatı Ə. Muxtarlının əlindən alıblar. Hətta onlar digər jurnalistlərin və orada olan insanların gözü qarşısında çəkinmədən onu vuraraq, yüngül bədən xəsarəti yetiriblər. Xəsarət nəticəsində Ə. Muxtarlı sol ayağının diz nahiyəsindən və əllərindən zədə alıb. Polis əməkdaşları onu söydükdən və təhqir etdikdən sonra zorla polis maşınına oturdublar. Yalnız DİN-in mətbuat xidmətinin rəhbəri Sadiq Gözəlovla əlaqə saxlanıldıqdan sonra jurnalisti sərbəst buraxıblar. Sonradan Ə. Muxtarlıdan müsadirə olunan fotoaparatın yaddaş kartı geri alınarkən məlum olub ki, Bakı şəhər Baş Polis İdarəsində yaddaş kartında olan, aksiya zamanı çəkilən bir neçə vacib kadr yaddaşdan silinib.

Müsavat Partiyası “Yeni Müsavat” qəzetinin əməkdaşı Əfqan Muxtarlıya qarşı edilən bu zorakılıq aktını qətiyyətlə pisləyir, bunu azad sözə edilən təcavüz kimi dəyərləndirir və Azərbaycan hakimiyyətindən belə zorakılıqlara son qoyulmasını və jurnalistə qarşı zor tətbiq etmiş polis əməkdaşlarının cəzalandırılmasını tələb edir.

isagambar.az, 09 yanvar 2009-cu il, Bakı