Hökməli qəsəbəsində evlərin sökülməsi ilə bağlı bəyanat

Məlum olduğu kimi, 05 avqust 2009-cu il tarixində Hökməli qəsəbəsində evlərinin sökülməsinə etiraz edən yerli sakinlərlə polislər və “Binəqədi Oyl” Neft Şirkətinin əməkdaşları arasında qarşıdurma olub. Qarşıdurma nəticəsində hər iki tərəfdən xəsarət alanlar olub və 3 nəfər kənd sakini həbs olunub. Son illər “qanunsuz tikili” adı altında vətəndaşlara məxsus tikililərin əvəzinə heç bir təzminat ödənilmədən sökülməsi geniş vüsət alıb. Bu, ölkədə qanunsuzluğun, özbaşınalıq və korrupsiyanın baş alıb getməsinin əyani sübutudur. Belə ki, insanların əllərində fərdi ev tikintisi üçün yerli bələdiyyədən torpaq sahəsi ayrılması haqqında sərəncamların olmasına məhəl qoyulmur və bu ərazilərin Azərbaycan Respublikası Dövlət Neft Şirkətinə (ARDNŞ) məxsus olduğunu əsas gətirərək tikililər uçurulur. Həmin mübahisəli məsələ ARDNŞ ilə yerli bələdiyyə arasında məhkəmədə çözülməli olduğu halda, bu işdə heç bir günahı olmayan insanların evlərinin uçurulması misli görünməmiş ədalətsizlikdir.

Müsavat Partiyası belə hesab edir ki, bütün baş verənlərin məsuliyyəti birbaşa ölkə rəhbərliyinin üzərinə düşür. Neçə illərdir ki, davam edən bu özbaşınalığa heç bir reaksiya verilmir, əksinə rüşvətxor məmurların sadə insanların iztirabı və pulları hesabına varlanmasına şərait yaradılır. Buna etiraz edən insanlara qarşı güc tətbiq edilir, repressiyaya məruz qoyulur. Məsələ hətta o yerə çatıb ki, iqtidar yaranmış vəziyyətin ictimaiyyət tərəfindən öyrənilməsinə və araşdırılmasına da imkan vermir. 09 avqust 2009-cu il tarixində məsələni araşdırmaq üçün Hökməli kəndinə ezam edilmiş Müsavat Partiyası Məclisinin katibi, Milli Məclisin deputat köməkçisi Tofiq Yaqublu qəsəbənin ərazisində qanunsuz olaraq tutularaq 40-cı polis bölməsinə gətirilmiş, yalnız bir müddət saxlanıldıqdan sonra sərbəst buraxılmışdır. Bu fakt bir daha sübut edir ki, hakimiyyət yaranmış vəziyyətdə özünün günahkar olduğunu bilir, lakin bunun ictimailəşməməsi üçün qanunsuz addımlar atır.

Müsavat partiyası vətəndaşların evlərinin qanunsuz olaraq sökülməsini qətiyyətlə pisləyir və hakimiyyəti öz məsuliyyətini dərk edərək, həmin insanların hüquqularını pozmamağa, bu işdə günahı olan müvafiq struktur və vəzifəli şəxslər haqqında ciddi tədbirlər görməyə çağırır.

isagambar.az, 10 avqust 2009-cu il, Bakı