Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyətinə və görülən işlərə baxıldıqdan sonra partiyadaxili məsələlər müzakirə edilib.
Bələdiyyə seçkiləri ilə bağlı Müsavat Partiyası Məclisinin sədri Sülhəddin Əkbər və Məclis üzvü Tapdıq Abbasın Saatlı, Sabirabad, İmişli, Beyləqan və Füzuli; Müsavat Partiyası Başqanının müavini Qabil Hüseynli və partiya fəalı Elman Fəttahın Neftçala, Salyan və Hacıqabul; Mərkəzi İcra Aparatının rəhbəri Arif Hacılı, Millət vəkili İkram İsrafil, partiya Məclisinin komissiya sədri Mustafa Hacılının Bərdə, Zaqatala, Qax, Şəki, Oğuz və Qəbələ; Divan üzvü Osman Kazım və partiya Məclisinin katibi Tofiq Yaqublunun Kürdəmir, Zərdab, Mingəçevir, Göyçay və Ağdaş; partiya Başqanının müavini Mehman Cavadoğlunun Ağsu, Şamaxı və Qobustan; Divan üzvü Gülağa Aslanlı və Məclis üzvü Hidayət İsmayılovun Biləsuvar, Cəlilabad, Masallı, Yardımlı, Lənkəran, Astara və Lerik, Millət vəkili Arzu Səmədbəyli və partiya Məclisinin komissiya sədri Məmməd Zeynalovun Naxçıvan Muxtar Respublikasındakı rayon təşkilatlarının fəalları ilə görüşləri haqqında məlumat verib.

Əksər rayonlarda görüşlər hakimiyyət nümayəndələrinin “xüsusi diqqəti” altında keçirilsə də, Bərdə rayonunda İcra Hakimiyyəti nümayəndələrinin və Yeni Azərbaycan partiyası rəhbərlərinin özbaşınalığı istisna olunmaqla digər rayonlarda xüsusi insident baş verməyib.

Partiyanın Divanı Bərdədə baş verən hadisələrlə bağlı Mərkəzi Seçki Komissiyasına rəsmi müraciət ünvanlamağı Seçki Departamentinə həvalə edib. Bu məsələnin Milli Məclisdə müzakirəyə çıxarılmasını Müsavat Deputat Qrupuna tövsiyyə edib. Bölgələrdə görüşlərin davam etdirilməsi ilə bağlı müvafiq tapşırıqlar verilib.
Türkiyə-Ermənistan münasibətlərinin nizama salınması ilə bağlı protokolların imzalanması məsələsi müzakirə edilib. Bu məsələnin partiyanın daima diqqət mərkəzində olduğunu, partiyanın son Məclisinin bəyanat qəbul etdiyini, Türkiyə dövlət rəsmilərinin bəyanatlarının arxasında duracaqlarına ümidvar olduqlarını bildirib.

Divan protokolların imzalanmasının regionda ciddi dəyişikliklərə səbəb ola biləcəyini qəbul etməklə həm Türkiyə, həm də Azərbaycan iqtidarının bu dəyişikliklərin Qarabağ məsələsinin ədalətli həllinə və iki qardaş ölkə arasında münasibətlərin daha da yaxşılaşmasına yönəlməsinə cəhd göstərməyi məqsədəuyğun hesab edir.

Toplantının sonunda cari məsələlərə baxılıb.

isagambar.az, 12 oktyabr 2009-cu il, Bakı