Müsavat Partiyasının
b ə y a n a t ı

Son vaxtlar yüksək vəzifəli dövlət məmurlarının vətəndaş cəmiyyətinə qarşı mübarizəsi yeni vüsət almağa başlayıb. Daxili İşlər naziri Ramil Usubovun tanınmış hüquq müdafiəçisi “Respublika və Qarabağ Uğrunda Vətəndaş Hərəkatı”nın koordinatoru Leyla Yunusu məhkəməyə verməsinin ardından Təhsil naziri Misir Mərdanovun tabeçiliyində olan Gəncə şəhər Təhsil şöbəsinin müdiri Mahal Məmmədovun “XXI əsr Təhsil mərkəzi”nin rəhbəri Etibar Əliyevə qarşı yeni məhkəmə iddiasını qaldırması dediklərimizə sübutdur. Son dövrlərdə Etibar Əliyevin təhsil sistemindəki problemlərə dair ardıcıl tənqidi yazıları, bu sahədə geniş yayılmış rüşvətxorluq və digər neqativ hallara qarşı kəskin çıxışları təhsil sistemi rəhbərlərini daima qəzəbləndirirdi. 15 orta məktəb direktorunun Etibar Əliyevi böhtançılıqda suçlayıb məhkəməyə verməsi, lakin bu iddianın məhkəmə tərəfindən rədd edilməsindən sonra nazirliyin rəhbərliyi yeni metoda əl atıb. Vaxtilə S. C. Pişəvəri adına orta məktəbdə direktor işləyərkən tanınan, hazırda Gəncə şəhərinin təhsil sisteminə rəhbər olan bu şəxs bu gün ittihamçı rolunda çıxış edərək Azərbaycan təhsilinin ciddi nöqsanlarını açıb göstərməkdə davam edən Etibar Əliyevi məhkəməyə verməsi Azərbaycan cəniyyətindəki acınacaqlı təzadlardan xəbər verir.

Müsavat Partiyası hər iki nazirin tanınmış qeyri-hökumət təşkilatlarının rəhbərlərinə qarşı məhkəmə iddialarını qətiyyətlə pisləyir, onlardan azad və müstəqil mövqeyə hörmət göstərərək məhkəmə iddialarını geri götürməyi tələb edir.

isagambar.az, 19 yanvar 2009-cu il, Bakı