Növbəti toplantı

Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.

İsa Qəmbər Türkiyə səfəri haqqında Divan üzvlərinə məlumat verdikdən sonra son zamanlar regionda yaranmış situasiya ilə bağlı ətraflı müzakirələr aparılıb və yaxın perspektivdə hansı proseslərin gedə biləcəyi haqqında təxminlər səsləndirilib. Divan bir daha əmin olduğunu bildirib ki, Türkiyə Azərbaycanın maraqları nəzərə alınmadan Ermənistanla sərhədləri açmayacaq. Azərbaycan və Türkiyə rəhbərliyindən birlikdə çalışmaq, hər şeyi diqqətlə ölçüb-biçmək və tələsik addımlar atmamaq istənilib.

İclasda Türkiyə və Azərbaycan – bu iki qardaş ölkə arasındakı münasibətlərin vəziyyəti müzakirə olunub. Millət vəkili Arzu Səmədbəyli bildirib ki, Müsavat Deputat Qrupuna daxil olan millət vəkillərindən Nəsib Nəsibli və Pənah Hüseyn Milli Məclisin Türkiyə-Azərbaycan dostluq qrupunun üzvləridir, digər millət vəkilləri – İkram İsrafil, İltizam Əkbərli və özü də bu qrupa daxil olmaq üçün ərizə yazmağı düşünürlər. Divan bu təşəbbüsü təqdir edib.

Müzakirə olunan məsələlərdən biri də bələdiyyə seçkiləri ilə bağlı olub. Partiyanın Mərkəzi Seçki Qərargahına seçkidə iştirakın bəzi hüquqi aspektləri haqqında arayış hazırlanması tapşırılıb.

Toplantının sonunda cari məsələlərə baxılıb.

isagambar.az, 20 aprel 2009-cu il, Bakı