Növbəti toplantı

Müsavat Partiyası Divanının növbəti toplantısı keçirilib. Gündəlik qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.
Çində uyğur türklərinə qarşı aparılan repressiyalara etiraz olaraq Müsavat Partiyasının bu ölkənin səfirliyi qarşısında keçirdiyi piketin nəticələri müzakirə edilib. Piketin ölkə və beynəlxalq mətbuatda işıqlandırılması qeyd olunub. Həmçinin qeyd edilib ki, piketdən sonra Çin səfirliyi Müsavat Partiyasına məktub yazaraq, həmin hadisələrlə bağlı ÇXR-nın rəsmi mövqeyini əks etdirən 4 səhifəlik sənəd təqdim edib. Müsavat Partiyası cavabında Çin səfirliyinə məktub göndərib, eyni zamanda piket zamanı qəbul edilmiş həmin hadisələri pisləyən qətnaməni təqdim edib (Hər iki sənəd əlavə edilir).

Divan dünya çapında həmin hadisələrin diqqət mərkəzində saxlanılmasını, ÇXR hökumətinə basqıların artmasını təqdir edib, eyni zamanda Azərbaycan iqtidarından öz mövqeyini bildirməyi bir daha tələb edib.

Emin Milli və Adnan Hacızadənin şərlənərək həbs edilməsinə beynəlxalq aləmdəki həssas münasibət, ardıcıl və sistemli mövqe bildirilməsi yüksək qiymətləndirilib, bu məsələnin ciddi şəkildə diqqət mərkəzində saxlanılması qərara alınıb.

Divan Qarabağ probleminin həlli üçün nəzərdə tutulmuş Moskva görüşünü müzakirə edib, bu görüşdən heç bir nəticə hasil olmadığını qeyd edib. Müsavat Partiyası danışıqların gedişini diqqətdə saxlayacaq.

Toplantının sonunda cari məsələlərə baxılıb.

isagambar.az, 20 iyul 2009-cu il, Bakı