Müsavat Partiyasının
b ə y a n a t ı

Son günlər ölkədə müxalifətə qarşı yeni repressiya dalğası başlayıb. Hər gün müxtəlif bölgələrdən müxalifət fəallarının, referendumla bağlı yaradılmış “Respublikaçılar” və “Qarabağ və Respublika Uğrunda” təşviqat qrupları üçün imza toplayan şəxslərin təqib edilməsi, təzyiqlərə məruz qalması, həbs olunması və əsassız olaraq polis şöbəsinə çağırılaraq onlara hədə-qorxu gəlinməsi barədə çoxsaylı məlumatlar alırıq. Bir neçə gün əvvəl Müsavat Partiyası Gəncə şəhər təşkilatının bir neçə fəalı, o cümlədən partiyanın Məclis üzvü Cahangir Əmirxanlı polis şöbəsinə çağırılaraq referendumla bağlı imza toplanılmasının şəhərdə qadağan olduğunu bildiriblər. Partiyanın Xaçmaz rayon təşkilatının sədri Ramazan Əliyev, Ağsuda AXCP fəalı Elşən Məmmədov da də anoloji təqiblərlə üzləşiblər. Sabirabadda isə polis AXCP fəalları Mövsüm Əsgərov və Rövşən Sadıqovu referendumla bağlı imza topladıqlarına görə həbs edib. Məhkəmə müvafiq olaraq onlara 3 və 2 sutka həbs cəzası kəsib. Cəlilabad rayonunun Üçtəpə kəndində icra nümayəndəsi, bələdiyyə sədri və sahə müvəkkili referenduma imza verən vətəndaşlara hədə-qorxu gəlir, onları öz imzalarından imtina etməyə məcbur edirlər.

Müsavat Partiyası bütün bunları hakimiyyətin Konstitusiyaya antidemokratik dəyişikliklər edilməsi ilə bağlı martın 18-də keçiriləcək referendumun nəticələrini indidən saxtalaşdırmaq cəhdi kimi qiymətləndirir. Bu dəyişikliklərin xalq tərəfindən dəstəklənməməsindən qorxuya düşən iqtidar elə indidən müxalifət fəallarını, vətəndaşları hədə-qorxu və zorakılıq yolu ilə susdurmağa çalışır. Partiya bütün bu özbaşınalıqlara və zorakılığa qəti etirazını bildirir və onların durdurulmasını tələb edir. Biz habelə müxalifət fəallarına qarşı qanunsuz rəftar edən bütün dövlət məmurlarının və polis işçilərinin cəzalandırılmasını tələb edirik.

isagambar.az, 22 yanvar 2009-cu il, Bakı