Növbəti toplantı

Bu gün Müsavat Partiyası Divanının növbəti toplantısı keçirilib. İlk olaraq bələdiyyə seçkilərinin gedişi haqqında məlumat verilib. Qeyd olunub ki, Müsavat namizədlərini seçkidən uzaqlaşdırmağa çalışan hakimiyyət namizədlərin qeydə alınması prosesində də ciddi qanun pozuntularını davam etdirib. Bölgələrdə bir qayda olaraq İcra Hakimiyyətlərinin nəzarəti altında fəaliyyət göstərən DSK-lara nəyin bahasına olursa-olsun Müsavat Partiyasının namizədlərini qeydə almamaq tapşırığı verildiyindən, görünməmiş özbaşınalıqlara yol verilib. Hətta bəzi yerlərdə artıq namizədliyi qeydə alınmış müsavatçıların namizədliyi sonradan ləğv edilib. Seçki komissiyalarının fəaliyyətini diqqətdə saxlamaq və namizədlərin qeydə alınması mərhələsi başa çatdıqdan sonra bu mərhələ haqqında ümumi münasibət bildirilməsi qərara alınıb.

Gündəliyin ictimai-siyasi vəziyyətə dair bölümündə İsa Qəmbər Barselona səfəri haqqında Divana ətraflı məlumat verdi. Divan üzvləri Müsavat Partiyasının beynəlxalq əlaqələrinin inkişafı, Qərbin bölgə ilə bağlı siyasəti və Güney Qafqazda gedən proseslər baxımından verilmiş informasiyaların çox əhəmiyyətli olduğunu qeyd etdilər.

Azərbaycan-Ermənistan danışıqları çərçivəsində aparılmış Münhen danışıqları haqda da müzakirə aparlıb. Qeyd edilib ki, bu yöndə müəyyən hərəkətlilik hiss olunur və Divan prosesi diqqətdə saxlamalıdır.

Daha sonra Sumqayıtın kimya müəssisələrində yaranmış məsələ müzakirə edilib. Qeyd edilib ki, “AzərKimya” şirkətinə məxsus müəssisələrdə çalışan 8 mindən çox işçi 3 aydan artıqdır ki, maaş ala bilmir. Buna etiraz edən, haqqını tələb edən işçilər təqib olunurlar, işdən çıxarılırlar. İş o yerə çatıb ki, “AzərKimya” şirkəti məhkəmə qərarlarını icra etməkdən də imtina edir. Yaranmış vəziyyət haqqında ayrıca bəyanat verilməsinə qərar verilib.

Toplantının sonunda cari məsələlərə baxılıb.

isagambar.az, 23 noyabr 2009-cu il, Bakı