23 dekabr 2009-cu il bələdiyyə seçkiləri
Müsavat Partiyası Mərkəzi Seçki Qərargahı

PRESS-RELİZ №1

Saat 11:30

Göyçay şəhər bələdiyyəsinə seçki keçirilən məntəqələrdə 10 nəfər adamın paltarını tez-tez dəyişdirərərək veb-kameralar quraşdırılan məntəqələrə aparıb səs verilməsi təşkil edilib.
***
8 saylı Binəqədi birinci seçki dairəsi üzrə Müsavat Partiyasının müşahidəçisi Qədir Nağıyev seçki günü saat 900-dək bu dairənin seçki məntəqələrinə buraxılmayıb.
***
8 saylı Binəqədi birinci seçki dairəsi üzrə 20 saylı seçki məntəqəsində saat 1000-dək cəmi 6 nəfər seçkiyə gəlib, saat 1000-da məntəqə seçki komissiyasının üzvləri seçki qutusuna dəstə-dəstə bülleten doldurublar. Eyni pozuntu halı həmin dairənin 22 saylı seçki məntəqəsində də baş verib.
***
33 saylı Xətai birinci seçki dairəsinin 10 saylı seçki məntəqəsində Müsavat Partiyasının namizədi Qasımov Bəkir Bayandur oğlu seçki komissiyasının sədri tərəfindən seçki məntəqəsinə buraxılmayıb. Komissiya sədri müxalifətdən bir kimsəni məntəqəyə buraxmayacağını hamının qarşısında bəyan edib.
***
Qaraçuxur bələdiyyəsinə seçkilər keçirilən ərazidə yerləşən 105 saylı MİS-in rəisi Abbas adlı şəxs “10 XX 470” dövlət nömrə-nişanlı “Mersedes” markalı maşınla MİS işçilərini seçki məntəqələrinə aparmaqla “karusel” təşkil edib və bu işə şəxsən özü rəhbərlik edir.
***
Müsavat Partiyasından qeydə alınmış namizəd Yusif Süleymanovun verdiyi məlumata görə, 8 saylı Binəqədi birinci seçki dairəsinin 10 saylı seçki məntəqəsində məntəqə ərazisində qeydiyyatda olmayan şəxsə seçki bülleteni verilib. Buna etiraz edən namizədə mənəvi təzyiq edilib.
***
30 saylı Suraxanı birinci seçki dairəsinin 24 saylı seçki məntəqəsində və 31 saylı Suraxanı ikinci seçki dairəsinin 13 saylı seçki məntəqəsində Müsavat Partiyasının səlahiyyətli nümayəndəsi Hökumə İbrahimliyə səsvermədə iştirak edən şəxslərin siyahısı ilə tanış olmağa imkan verilməyib.
***
Hövsan bələdiyyəsindən müşahidəçinin verdiyi məlumata görə, seçki məntəqəsində eyni adamlar dəfələrlə səs verir.
***
Binəqədi bələdiyyəsinin ərazisində fəaliyyət göstərən 102 saylı MİS-in 15 nəfərdən ibarət işçisi 8 saylı Binəqədi birinci seçki dairəsinin 16, 17, 18, 19, 20 və 21 saylı seçki məntəqələrində saat 1100-dək səsvermədə iştirak ediblər. Bu dəstə fəaliyyətini hələ də davam etdirir.

PRESS-RELİZ №2

Saat 13:15

Xaçmaz rayonundan Müsavat Partiyasının səlahiyyətli nümayəndəsi Ramazan Əliyevin verdiyi məlumata görə, rayon ərazisində olan bələdiyyələrdə saat 1200-dək seçicilərin iştirakı 5 faizdən azdır. Seçki komissiyalarına məntəqələrdəki seçki qutularını doldurmaq tapşırığı verilib.
***
107 saylı Qazax seçki dairəsinin 10 saylı seçki məntəqəsində Müsavat Partiyasından olan müşahidəçi Lətifət Məlikovanın verdiyi məlumata görə, o, bu məntəqədə YAP tərəfindən təyin olunmuş müşahidəçinin əlində səsvermə kabinəsindən çıxarkən bir neçə doldurulmuş seçki bülleteni tutub və bu faktı komissiya sədrinə təqdim edib.
***
8 saylı Binəqədi birinci seçki dairəsinin 5 saylı seçki məntəqəsində adı seçici siyahısında olmayan şəxsin sənədləri ilə tanış olmadan barmağına xüsusi maye vurduqdan sonra səhv etdiklərini bildiriblər. Lakin buna baxmayaraq, daha bir qanunsuzluq edərək, həmin şəxsə səs verməyə şərait yaradıblar.
***
Müsavat Partiyasından bələdiyyə üzvlüyünə namizəd Tarıverdi Hüseynovun verdiyi məlumata görə, 61 saylı Neftçala seçki dairəsinin 3 saylı məktəbdə yerləşən 1 saylı seçki məntəqəsində, eləcə də 5 saylı seçki məntəqəsində bülletenləri dəstə-dəstə qutulara doldururlar.
***
Müsavat Partiyasından bələdiyyə üzvlüyünə namizəd Fikrət Cəfərlinin verdiyi məlumata görə, 98 saylı Şəmkir seçki dairəsinin 1 saylı məntəqəsində (İcra Hakimiyyətinin binasının yanında) səsvrməyə gələn seçicilərə seçkiyə gəlməyin mənasının olmadığı, protokolların dünəndən hazır olduğu bildirilir. Bütün məntəqələrə yetərsayın 20 faizdən artıq olmaması barədə məlumat verilməsi tapşırılıb.
***
Müsavat Partiyası Hacıqabul rayon təşkilatının sədri Z.Səmədbəylinin verdiyi məlumata görə, 58 saylı Hacıqabul seçki dairəsinin 3, 4, 5, 6, 7, 8, 9, 10, 11 saylı seçki məntəqələrində bülletenləri dəstə-dəstə qutulara doldururlar.
***
Hövsan bələdiyyəsinə seçkilər keçirilən 30 saylı Suraxanı birinci seçki dairəsinin 8 saylı seçki məntəqəsində saxtakarlığa etiraz edən, MSK tərəfindən təyin edilmiş respublika üzrə müşahidəçi Afina xanım polis tərəfindən saxlanılaraq Suraxanı rayonundakı 30 saylı polis bölməsinə aparılıb.
***
Müsavat Partiyasının səlahiyyətli nümayəndəsi Samir Abbaslının Göyçay rayonundan verdiyi məlumata görə, 88 saylı Göyçay seçki dairəsindəki bələdiyyələrə seçkilərdə əhalinin iştirakı çox aşağı səviyyədə olduğuna görə bir neçə seçki məntəqəsi olan bələdiyyələrdə “karusel” metodundan açıq şəkildə istifadə olunub. Veb-kamera qurulan məntəqələrdə isə “karusel” əməliyyatında bir qrup şəxs paltarlarını dəyişərək iştirak ediblər.

PRESS-RELİZ №2

Saat 16:00

Qobustan bələdiyyəsinə namizədliyi qeydə alınmış Səxavət Soltanovun verdiyi məlumata görə, o, 11 saylı Qaradağ seçki dairəsinin 8 saylı seçki məntəqəsində səs vermək istəyərkən seçici siyahısında öz adının qarşısında başqa şəxs tərəfindən imza qoyulduğunu aşkar edib. Seçki komissiyasının sədrinə bu işin saxtakarlıq olduğunu bildirib. Seçki komissiyasının sədri isə ona “heç narahat olma, səs-küy salma, onsuz da sənin adın bizə verilən yekun siyahıda yoxdur” söyləyib.
***
8 saylı Binəqədi birinci seçki dairəsindən namizədliyi Binəqədi bələdiyyəsinə qeydə alınmış Rauf Səlimov bildirib ki, bu dairənin 15 saylı seçki məntəqəsində məcburi köçkünlər səs verməyə cəlb edilib. 14 saylı seçki məntəqəsində seçicilərə 2 və daha artıq bülleten verilib. MİS-in işçilərinə ardıcıl olaraq 26 və 27 saylı seçki məntəqələrində səs verməyə şərait yaradılıb. YAP-ın deputatları Hacı Madər Musayev və Eldar İbrahimov video kameraların müşayiəti ilə bu dairənin seçki məntəqələrini gəzir və seçki komissiyalarının sədrləri ilə söhbət edib, tapşırıqlarını verirlər. Onlar 27 saylı seçki məntəqəsində olarkən məntəqə seçki komissiyasının işçiləri sənədləri yoxlamadan bir neçə şəxsə seçki bülletenləri verərək onların səs verməsinə şərait yaradıb.
***
Tərtər bələdiyyəsinə namizədliyi qeydə alınmış Xəqani Məmmədin verdiyi məlumata görə, Tərtər rayonu üzrə seçki keçirilən bütün bələdiyyələrdə icra hakimiyyətinin təyin etdiyi nümayəndələr seçki məntəqələrinin ətrafına toplaşaraq seçkiyə gələn insanlara “artıq seçki prosesi başa çatıb, sizin səs vermənizə heç bir ehtiyac yoxdur, artıq seçilməli olan adamlar seçilib” deyərək, onları seçki məntəqələrinə getməməyə təhrik edirlər.
***
Müsavat Partiyası Beyləqan rayon təşkilatının sədri Nadir Ələsgərlinin verdiyi məlumata görə, bu rayonun bələdiyyələrinə keçirilən seçkilərdə günün ikinci yarısından başlayaraq bir neçə öyrədilmiş adamlar tərəfindən seçki bülletenlərinin seçki qutularına dəstə-dəstə doldurulması adi hal alıb. Bülletenlərin doldurulması işini isə seçki komissiyasının üzvləri həyata keçirir. Seçki məntəqəsində olmasına icazə verən heç bir sənədi olmayan şəxslər seçki məntəqələrində seçki işinə rəhbərlik edirlər.
***
Müsavat Partiyası Xətai rayon təşkilatının sədri Mustafa Hacılının verdiyi məlumata görə, Xətai bələdiyyəsinə keçirilən seçkilərdə istifadə olunan “karusel”də yeni saxtakarlıq texnologiyası tətbiq olunur. Belə ki, “karusel” prosesində iştirak edən şəxslər seçki bülletenlərində yalnız bir namizədə səs verib seçki bülletenlərini seçki qutularına salırlar. Müsavat Partiyasından olan namizədin belə şəxslərdən birinə “siz nə tez səsvermə prosesini başa çatdırdınız” sualına cavab olaraq bildirilib ki, “bizə tapşırıq belə olub, deyiblər ki, günün sonunda da sizə tapşırığımız olacaq”. Buradan aydın olur ki, bu yolla seçki komissiyası seçicilərin sayını artırır. Seçki bülletenlərində digər namizədlərə səs vermək işinin öhdəsindən özləri gələcəklər.
***
Müsavat Partiyasının səlahiyyətli nümayəndəsi Cahangir Əmirovun verdiyi məlumata görə, Gəncə şəhərindəki bələdiyyələrə keçirilən seçkilərdə əhalinin iştirakı 1 faizdən yuxarı deyil. Lakin qabaqcadan büdcə təşkilatlarında işləyən bütün şəxslərə bu gün iş yerində olmaq tapşırığı verilib ki, onlardan da “karusel” əməliyyatını yerinə yetirməkdə istifadə edilir.

Seçki məntəqələrindən məlumatların toplanması davam edəcək.

isagambar.az, 23 dekabr 2009-cu il, Bakı