Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyətinə və görülən işlərə baxıldıqdan sonra partiyadaxili məsələlər müzakirə edilib.
Bələdiyyə seçkiləri kampaniyasının gedişatı müzakirə edilib. Millət vəkili İkram İsrafilin, Məclis katibi Tofiq Yaqublunun və Müsavat Gənclər Təşkilatının sədri Tural Abbaslının bu məqsədlə ölkənin Qərb bölgələrinə etdikləri səfər haqqında Divana məlumat verilib. Divan Bələdiyyə seçkilərində iştirakla bağlı müvafiq qərarlar qəbul edib. Bələdiyyə seçkiləri zamanı real müxalifət partiyaları ilə sıx əməkdaşlıq ediləcəyi və qarşılıqlı dəstək veriləcəyi bir daha təsdiq edilib.

Divan ölkə başçısının imzaladığı və qadınların pensiya yaşının artırılmasını nəzərdə tutan qanun layihəsinin Milli Məclisin plenar iclasına təqdim edilməsinə münasibət bildirib. Qeyd edilib ki, bu hakimiyyətin sosial və iqtisadi siyasətinin açıq-aşkar iflasıdır. Qəbul ediləcəyi təqdirdə ahıl insanların sosial durumunu daha da pisləşdirəcək bu qanun layihəsinə qəti etiraz edilib.

Divan qardaş Türkiyə xalqını Cumhuriyyət Günü münasibətilə təbrik edib və bununla bağlı oktyabr ayının 29-da keçiriləcək tədbirlər haqqında müzakirə aparıb.

Həbsxanada olan vicdan məhbusu Eynulla Fətullayevin 30 oktyabr siyasi məhbuslar günü ilə bağlı qəzetlərə siyasi məhbus həftəliyi keçirmək tövsiyyəsini nəzərə alan Divan bu təklifi müdafiə etdiyini bildirib.

Şair Məmməd İsmayılın 70 illik yubileyi ilə bağlı qərar qəbul edilib. Qərara əsasən 31 oktyabr 2009-cu il tarixində saat 15.00-da partiyanın qərargahında təntənəli tədbir keçiriləcək.

Toplantının sonunda cari məsələlərə baxılıb.

isagambar.az, 26 oktyabr 2009-cu il, Bakı