Müsavat Partiyasının bəyanatı

Aprelin 24-də ABŞ prezidenti Barak Obama xalqa müraciət edib. Bu dəfə ABŞ prezidenti ona qədərki prezidentlərdən fərqli mövqe nümayiş etdirərək, qondarma erməni soyqırımını erməni dilində “Böyük qırğın” mənasını verən kəlmələrlə ifadə edib və 1,5 milyon erməninin qətliama məruz qaldığını iddia edib. Sırf tarixçilərin və elmi araşdırmaçıların işi olan bir mövzuya siyasətçinin münasibət bildirməsi kifayət qədər suallar yaradır. ABŞ prezidentinin erməni xalqına ünvanlanmış təriflə dolu 94 illik özünütəsdiqetmə prosesindən xüsusi həvəslə danışması təəccüb doğurmaya bilmir. Çünki bu illər başqa xalqlara qarşı terror əməlləri, xüsusən də Azərbaycan xalqına qarşı irimiqyaslı qətliamlar, etnik təmizləmə, deportasiyalar, işğal amilləri ilə zəngindir. Təkcə 90-cı illərdə Azərbaycan torpaqlarının böyük bir hissəsinin işğal edilməsi, buradan yüz minlərlə insanın doğma yurdlarından didərgin düşmələri, Ermənistanda və işğal edilmiş Qarabağda etnik təmizləməlr, 1992-ci il Xocalı qətliamı “erməni özünütəsdiqi”nin qanlı səhifələrindəndir.

Müsavat Partiyası Ermənistanın Azərbaycana ərazi iddiaları və təcavüzü nəticəsində yaranmış Qarabağ probleminin həllində həmsədr olan bir dövlətin başçısının bu cür tərəfkeş mövqeyindən narahatlığını bildirir və hesab edir ki, bu cür təəssübkeşliklər erməniləri şirnikləndirməklə problemin nizamlanmasına mənfi təsir göstərə bilər.

isagambar.az, 27 aprel 2009-cu il, Bakı