Növbəti toplantı

Müsavat Partiyası Divanının növbəti toplantısı keçirilib. Gündəlik, qərarların icrası, görülən işlər, partiyadaxili və ictimai-siyasi vəziyyətə dair məsələlərdən ibarət olub.
Bələdiyyə seçkiləri ilə bağlı müzakirə aparılıb. Qeyd edilib ki, seçkilərə nəzəri cəhətdən siyasi partiyalar bloku, ayrıca partiya şəklində və ya fərdi qaydada qatılmaq olar. Mövcud variantların üstünlükləri və problemli tərəfləri haqqında fikir mübadiləsi aparılıb. Bələdiyyə seçkiləri ilə bağlı Seçki Məcəlləsində boşluqlar və uyğunsuzluqlar olduğu qeyd olunub və müsavatçı millət vəkillərinə bu məsələni Milli Məclisdə qaldırmaq həvalə edilib.

May ayının 2-də partiya Məclisinin növbəti toplantısını keçirmək qərara alınıb.

Gündəliyin ictimai-siyasi vəziyyətə dair bölümündə ABŞ prezidenti Barak Obamanın 24 aprel çıxışında uydurma soyqırım haqqında ermənicə “böyük qırğın” sözü işlətməsinə münasibət bildirirlib və partiya adından ayrıca bəyanat qəbul edilib (bəyanatın mətni əlavə edilir). Divanda həmçinin qeyd edilib ki, Türkiyə-Azərbaycan münasibətlərində son zamanlar yaranmış gərginlik mərhələsinə nöqtə qoyulmalıdır. Divan Azərbaycan və Türkiyə hökumətlərini yaranmış gərginliyi aradan qaldırmağa və bu məsələdə birgə hərəkət etməyə çağırıb.

Ölkədə iqtisadi böhranın təsirlərinin getdikcə daha çox hiss olunduğu vurğulanıb. Qeyd edilib ki, ölkənin əsas sənaye mərkəzlərindən olan Sumqayıtda bu ilin əvvəlindən iri sənaye müəssisələrinin bağlanması on minlərlə adamın işsiz qalmasına səbəb olub. Son günlərdə Sumqayıt maşın bazarının bağlanması daha 1000-dən çox adamın işsiz qalmasına səbəb olub. Qeyd olunub ki, Gəncə və Şamaxıda da bir sıra iri sənaye müəssisələri bağlanıb. Divan hökumətdən müəssisələrin bağlanmasının qarşısını almağı və indiyədək müəssisələrin bağlanması ilə iş yerlərini itirmiş adamların işlə təmin edilməsi üçün təsirli tədbirlər görməsini tələb edib.

Toplantının sonunda cari məsələlərə baxılıb.

isagambar.az, 27 aprel 2009-cu il, Bakı