Rəis Rəsulzadə ilə partiya rəhbərliyinin görüşü

Bu gün Müsavat Partiyasının qərargahında böyük öndər Məhəmməd Əmin Rəsulzadənin nəvəsi Rəis Rəsulzadə ilə partiya rəhbərliyinin görüşü keçirilib. Azərbaycan Xalq Cümhuriyyətinin ildönümü ərəfəsində keçirilən görüşü giriş sözü ilə açan Müsavat Partiyasının başqanı İsa Qəmbər Xalq Cümhuriyyətinin əhəmiyyətindən, onun yaradıcılarının xalqımız və ölkəmiz qarşısındakı müstəsna xidmətlərindən danışıb. Qeyd edib ki, bütün müsəlman şərqində ilk demokratik cümhuriyyətin məhz Azərbaycanda yaranması bizim milli iftixarımızdır. O, Xalq Cümhuriyyətinin mövcud olduğu 2 il ərzində dövlət quruculuğu, ərazi bütövlüyü və azad vətəndaş cəmiyyətinin yaradılması istiqamətində görülən işləri yüksək qiymətləndirib. İsa Qəmbər deyib ki, yalnız Xalq Cümhuriyyətinin bizə qoyub getdiyi zəngin miras, yaratdığı dəyərlər sisteminə sahib durmaqla Azərbaycanın tərəqqisinə nail olmaq mümkündür. Bugünkü Azərbaycan gəncliyinin həmin dəyərlərə sayğılı münasibət bəslədiyini vurğulayan Müsavat başqanı bunu cümhuriyyət ideallarının təntənəsi kimi dəyərləndirib.

Sonra Rəis Rəsulzadə görüş üçün partiya rəhbərliyinə təşəkkür edib və cümhuriyyət dövrünün dəyərlər sisteminin, həmin cümhuriyyəti quran şəxsiyyətlərin daha geniş şəkildə təbliğ olunmasının zərurətindən danışıb.

Görüşdə Müsavat Partiyası başqanının müavinləri Arif Hacılı, Arzu Səmədbəyli, Mehman Cavadoğlu, partiyanın Məclis üzvləri Nəsiman Yaqublu və Sabir Məmmədli də çıxış edərək həmin dövrün Azərbaycan tarixindəki əhəmiyyətindən danışıblar.

isagambar.az, 27 may 2009-cu il, Bakı