İSA QƏMBƏR: “HƏRƏ ÖZÜNDƏN DANIŞMALIDIR. HƏRƏ ÖZÜNƏ QİYMƏT VERMƏLİDİR”
“Media forum” saytının suallarını Müsavat Partiyasının başqanı İsa Qəmbər cavablandırır.

- 2009-cu ili ölkə, cəmiyyət və Müsavat Partiyası üçün necə dəyərləndirirsiniz?

- Mən Əliyev rejimi dönəmindəki bütün illəri Azərbaycan üçün itirilmiş illər hesab edirəm. 2009-ci il də, təəssüf, istisna olmadı. Xalqımız, dövlətimiz üçün itirilmiş ildir.

2009-cu ildə iki böyük saxtakarlıq hadisəsi oldu. Birincisi referendum saxtakarlığıdır. Prezident seçilməyə müddət məhdudiyyətinin aradan qaldırılması Azərbaycanı orta əsrlərə aparmaq cəhdidir. İlin sonunda isə bələdiyyə seçkiləri adı altında ikinci böyük saxtakarlıq həyata keçirildi. Buna ad tapmaq belə mümkün deyil. Bu, Əliyev rejiminin sovet dönəminin seçki praktikasını bərqərar etmək istiqamətində atdığı addım oldu.

2009-cu ildə çox ciddi mənfi işarəli hadisələr baş verdi. Çoxlu qətllər, intiharlar oldu. Ən böyük qətliam – hamımızı sarsıdan ən böyük faciə isə gənclərimizin, müəllimlərimizin, ziyalılarımızın həlak olduğu 30 aprel terror aksiyasıydı. Neft Akademiyasındakı bu terror aktı çox dəhşətli hadisəydi.

Siyasi terror, siyasi həbslər, jurnalistlərin, bloqçuların həbsə alınması və bir çox məqamlar 2009-u mənfi hadisələrlə zəngin ilə çevirdi.

Təəssüf ki, bu il ərzində heç bir məsələdə irəliləyiş əldə edə bilmədik. Torpaqlarımızın işğaldan azad edilməsi, xalqımızın həyat səviyyəsinin yüksəlməsi, cəmiyyətdə azadlıqların yayılması məsələlərində heç bir irəliləyiş yoxdur.

Çox çətin il oldu. Amma mən hesab edirəm ki, həm də kifayət qədər nəticə çıxarmalı il oldu.

Müsavat Partiyasına gəldikdə isə partiyamız hər zaman olduğu kimi fəaliyyətini davam etdirdi, mövqeyini ifadə etdi. Elə bir ciddi hadisə olmayıb ki, Müsavat Partiyası onunla bağlı mövqeyini bildirməsin, haqqın-ədalətin yanında olmasın, haqsızlıqla, ədalətsizliklə mübarizə etməsin. Hesab edirəm ki, 2009-cu il Müsavat Partiyası üçün cəmiyyətlə əlaqələrin gücləndirilməsi, cəmiyyətlə bütünləşmə hədəfinə yaxınlaşmaq baxımından önəmli il oldu. Müsavatçıların fədakarlığı hesabına bu il atılmış addımlar gələn il öz bəhrəsini verməyə başlayacaq.

- Dediniz ki, 2009 nəticə çıxarmalı il oldu. Hansı nəticələrdən söhbət gedir?

- Hakimiyyətin zəifləməyə başlamasından söhbət gedir. Hazırda bir çoxları bunu bəlkə də hiss etmir. Əksinə, cəmiyyətdə hakimiyyətin güclü olması əhvalı var. Amma mən hesab edirəm ki, bu il hakimiyyətin zəiflədiyi il oldu. Hakimiyyətin öz ictimai dayaqlarını daha da itirdiyi, bu dayaqların sarsılmağa başladığı il oldu. Bu, ilin sonunda bir çox hadisələrdə, o cümlədən bələdiyyə seçkilərinin gedişində özünü göstərdi.

Eyni zamanda ölkəmizdə və bölgədə gedən proseslər bir sıra nəticələr çıxarmağa əsas verir. Dünyada qlobal dəyişikliklər başlayıb və bu, bölgəmizdə də, Azərbaycanda da özünü çox ciddi şəkildə göstərəcək.

- 2010-cu illə bağlı nikbin proqnozlarınız var. Bu nikbinlik nəyə əsaslanır?

- Dünyada gedən prosesləri də, bölgəmizdə gedən prosesləri də, cəmiyyətimizdə gedən prosesləri də təhlil edərək o nəticəyə gəlirəm ki, 2010-cu ildə Azərbaycanda çox ciddi dəyişikliklər tamamilə mümkündür. Sadəcə olaraq o dəyişikliklərin nə cür işarələnəcəyi xeyli dərəcədə xalqımızdan və hər birimizdən asılıdır. Mən hesab edirəm ki, xalqımız, cəmiyyətimiz fəal olsa, gələn il müsbət dəyişikliklər tamamilə realdır.

- Parlament seçkilərini nəzərdə tutursunuz yəqin ki...

- Parlament seçkiləri də o hadisələrin içindədir.

- Xalqın fəal olacağının işartıları varmı, sizcə?

- İşartılar, təbii, var. Sadəcə, mən onları xüsusi qabartmağa ehtiyac hiss etmirəm. Amma bu məsələ həm də hər birimizdən asılıdır. Bilirsiz, cəmiyyətin passiv olduğunu, heç nəylə maraqlanmadığını deyə-deyə sanki cəmiyyətin özünü bu fikrə alışdırmaq tendensiyası var. Bu tendensiyaya son qoymaq lazımdır. Hərə özündən danışmalıdır. Hərə özünə qiymət verməlidir ki, mən bu cəmiyyətin fəallaşması üçün nə etmişəm, nə etməliyəm. Hər bir şəxs bu barədə fikirləşməlidir. Təbii, aparıcı müxalifət qüvvəsi olaraq Müsavat Partiyası cəmiyyətin fəallaşması, real müxalifətlə cəmiyyətin bütünləşməsi istiqamətində ciddi fəaliyyət göstərmək fikrindədir.

- Yeri gəlmişkən, nizamnaməyə görə, 2010-cu ildə Müsavat Partiyasının qurultayı keçirilməlidir. Qurultay olacaqmı?

- Partiya rəhbərliyindəki məsləhətləşmələrə əsasən, qurultayı 2010-cu ilin sonunda keçirməyi düşünürük. Nizamnaməyə görə, 4 ildən bir partiyanın qurultayı olmalıdır. Son qurultay 2006-cı ildə olubsa, 2010-cu ildə də növbəti qurultayımız olmalıdır. Bilirsiniz ki, Müsavat Partiyası hər zaman nizamnaməyə əməl etməyə çalışır. Düşünürəm ki, bu dəfə də belə olacaq.

«Media forum», 2009-12-30
http://www.mediaforum.az/articles.php?lang=az&page=02&article_id=20091230035638801