Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər müzakirə olunub.
Yığıncağın əvvəlində Məclisin ötən gün keçirilmiş toplantısı haqqında fikir mübadiləsi aparılıb. Səslənmiş təkliflərin dəyərləndirilməsi və qəbul edilmiş qərarların yerinə yetirilməsi üçün konkret tapşırıqlar verilib.

Gündəliyin ictimai-siyasi vəziyyətə dair bölümündə kütləvi aksiyalar əsas müzakirə olunan məsələ olub. İlkin razılaşmaya görə, mayın 21-də mitinq keçirilməsi qət edilib. Eyni zamanda birgə kütləvi aksiyalar keçirməsi yönündə digər müxalifət partiyaları, ilk növbədə DUİ ilə məsləhətləşmələrin davam etdirilməsi qərara alınıb.
Azərbaycan Dövlət Neft Akademiyasında baş vermiş terror hadisəsinin ildönüm ilə bağlı gənclərin keçirdikləri aksiyanın zorakılıqla dağıdılmasına kəskin etiraz edilib və həbsdə olan müsavatçı və ADP-çi gənclərin dərhal azad olunması tələb edilib.

Toplantının sonunda cari məsələlərə baxılıb.

isagambar.az, 03 may 2010-cu il, Bakı