Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər müzakirə olunub.
Gündəliyin partiyadaxili məsələ bölümündə Seçki Departamenti tərəfindən hazırlanmış parlament seçkiləri ilə bağlı partiyanın fəaliyyət planının layihəsinin müzakirələri davam etdirilib və müvafiq qərarlar qəbul edilib.

Ukraynada prezident seçkilərini II turunun nəticələri haqqında fikir mübadiləsi aparılıb. Qeyd edilib ki, seçkilər azad və ədalətli keçirilib, səsvermənin nəticələrinə təsir edəcək pozuntular baş verməyib. Ukraynada demokratiyanın inkişaf prosesinin dönməz xarakter aldığı və bu məsələdə Viktor Yuşşenkonun xüsusi xidmətlərinin olduğu qeyd edilib.

“Eks-prezidentlərin statusu haqqında” Qanun layihəsinə görə bu qanunun Azərbaycanın demokratik yolla seçilmiş yeganə prezidenti, milli-azadlıq hərəkatının lideri olmuş Əbülfəz Elçibəyə şamil edilməməsi niyyəti ciddi narahatçılıqla qarşılanıb, bu demokratik dövlət quruculuğu prinsiplərinə etinasızlıq kimi qiymətləndirilib.
Hakimiyyətinin KİV haqqında qanuna mürtəce dəyişikliklər etməyə hazırlaşması haqda da müzakirələr aparılıb. Müsavat Deputat Qrupunun üzvlərinə bu məsələnin Milli Məclisdə müzakirəsi zamanı onun qəbul edilməməsi üçün ciddi müqavimət göstərmək tapşırılıb. Qeyd edilib ki, son dövrlərdə hakimiyyət məqsədyönlü şəkildə bir sıra qanunlara mürtəce dəyişikliklər edib.

MDQ üzvlərinə həmçinin qaz, elektrik və su sayğaclarının bütün istehlakçılara pulsuz quraşdırılmasını nəzərdə tutan qanunlarda qanunsuz olaraq dəyişiklik edilməsi məsələsi ilə bağlı şikayətin müvafiq instansiyalara göndərilməsini tezləşdirmələri və bu məsələni diqqətdə saxlamaları tapşırılıb.

Son günlər Bakıya və ölkənin digər regionlarına güclü qar yağmasından sonra yaranmış vəziyyət də müzakirə olunan məsələlər arasında olub. Qeyd edilib ki, qar hakimiyyətin bacarıqsızlığını tam çılpaqlığı ilə ortaya qoyub. Qar və çovğun haqqında bir neçə gün əvvəlcədən məlumat verilməsinə baxmayaraq, FHN və digər infrastrukturlar tamamilə hazırlıqsız olublar. Nəticədə Bakıda və bir sıra bölgələrdə həyat tamamilə ifilc olub. Divan öz kəskin etirazını bildirib və hakimiyyəti yaranmış vəziyyətə görə cavabdeh olan vəzifəli şəxslərlə bağlı tədbir görməyə çağırıb.

Yığıncağın sonunda İsa Qəmbər Norveçin Ədliyyə naziri Knut Storbergetlə görüş haqqında məlumat verib.

Toplantının sonunda cari məsələlərə baxılıb.

isagambar.az, 08 fevral 2010-cu il, Bakı