Növbəti toplantı

Bu gün Müsavat Partiyasının Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər müzakirə edilib.
Seçkilərə hazırlıq məqsədilə yaxın günlərdə ayrı-ayrı bölgələrdə zona müşavirələrinin keçirilməsi qərara alınıb.

Sonra ölkədəki ictimai-siyasi vəziyyət müzakirə edilib. Kür çayının suyunun daşması nəticəsində yaranməş vəziyytlə bağlı fikir mübadiləsi aparılıb bəyanat qəbul edilib (bəyanatın mətni əlavə edilir).

Toplantıda ölkə mediasında yaranmış son durumla bağlı da müzakirələr aparılıb. Avropa İnsan Haqları Məhkəməsinin qərarından xeyli vaxt keçməsinə baxmayaraq “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevin, eləcə də gənc bloggerlər Emin Milli və Adnan Hacızadənin hələ də qanunsuz olaraq həbsdə saxlanılması, bütün bunlar azmış kimi Eynulla Fətullayev haqqında uydurma ittihamlarla yeni bir məhkəmə şousunun qurulması da qətiyyətlə pislənilib. Son vaxtlar “Yeni Müsavat” qəzetinin baş redaktorunun 1-ci müavini Azər Ayxanın da saxta ittihamla həbs olunmaq təhlükəsi ilə üzləşməsi də müzakirə olunub və hakimiyyətdən bu oyunlara son qoyulması tələb edilib.

Yığıncaqda ölkədə keçirilən saxta gül bayramı ilə bağlı müzakirələr aparılıb. Qeyd edilib ki, terror qurbanı olan gənc tələbələrin həyatına biganə münasibət bəslənən bir ölkədə bu cür mənasız tədbirlərə milyonlarla manat pul xərcləməsi hakimiyyətin qəddar və talançı mahiyyətinin əyani göstəricisidir.

Toplantının sonunda cari məsələlərə baxılıb.

isagambar.az, 10 may 2010-cu il, Bakı