Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər müzakirə olunub.
Yığıncağın əvvəlində Bələdiyyə seçkilərinin yekunları müzakirə edilmiş və partiyanın yekun rəyinin hazırlanması ilə bağlı tövsiyyə və tapşırıqlar verilmişdir.

Partiyadaxili məsələ bölümündə Məclisin 16 yanvar 2010-cu il tarixdə keçiriləcək sessiyasına hazırlıqla bağlı məlumat verilib. Sessiyanın gündəlik layihəsinə təkliflər verilib.

Gündəliyin ictimai-siyasi vəziyyətə dair bölümündə bu ilin sonunda keçiriləcək Parlament seçkiləri ilə bağlı fikir mübadiləsi aparılıb və partiyanın müvafiq strukturlarına zəruri tapşırıqlar verilib.

Naxçıvanın Bənənyar kəndində baş vermiş hadisələr, gənc bloggerlərin məhkəməsinin təxirə salınması, vicdan məhbusu Eynulla Fətullayevin işinin Avropa İnsan Haqları Məhkəməsində baxlıması ərəfəsində narkotiklə şərlənməsi və qrant almış QHT-lərin fəaliyyətinə başlamaq üçün yeni inzibati maneələr yaradılmasına münasibət bildirilərək bəyanat qəbul edilib (bəyanatın mətni əlavə olunur).

Azərbaycan xalqının müstəqillik uğrunda mübarizəsinin ən önəmli səhifələrindən olan 20 Yanvar hadisələrinin 20-ci ildönümü ilə bağlı 19 yanvar 2010-cu il tarixində, saat 15: 00-da partiya qərargahında Şəhidlərin anım mərasimi keçiriləcək. Yanvarın 20-də isə saat 14: 00-da Şəhidlər Xiyabanının ziyarət edilməsi qərara alınıb.

Toplantının sonunda cari məsələlərə baxılıb.

isagambar.az, 11 yanvar 2010-cu il, Bakı