Növbəti toplantı

Bu gün Müsavat Partiyası Divanının növbəti toplantısı keçirilib. Qərarların icra vəziyyəti və görülən işlərə baxıldıqdan sonra partiyadaxili məsələlər barədə fikir mübadiləsi aparılıb.

Gündəlikdə əsas müzakirə olunan məsələ seçkilərə hazırlığın gedişatı ilə bağlı olub. AXCP ilə dairələr üzrə vahid namizədlərin müəyyənləşdirilməsi yönündə aparılan danışıqlar haqqında məlumat verilib. Daha bir neçə dairədə vahid namizədin razılaşdırıldığı qeyd edilib.

Divanın ictimai-siyasi vəziyyətə dair bölümündə Azərbaycanın BMT-nin Baş Assambleyasının gündəliyindən “İşğal edilmiş ərazilərdə vəziyyət haqqında” qətnamə layihəsini geri çəkməsi məsələsi müzakirə edilib. Qeyd edilib ki, Azərbaycan tərəfi əvvəlcə qətnamə layihəsinin müzakirəsinin təxirə salınmasını istəyib, sonra isə onu tamamilə geri çəkib. Divan bu hadisəni Azərbaycanın Qarabağla bağlı yürütdüyü xarici siyasətinin qeyri-ardıcıl olmasının, iqtidarın çaşqınlıq içərisində olduğunun göstəricisi kimi qəbul edərək hakimiyyətdən bu addımları haqqında izahat tələb edir.

Son günlərdə Lənkəranda, İsmayıllıda və Sumqayıtda baş vermiş ağır cinayət hadisələri haqqında da fikir mübadiləsi olub. Qeyd edilib ki, xeyli sayda insanların ölümü və yaralanması ilə nəticələnmiş bu hadisələr iqtidarın yürütdüyü daxili siyasətində də ciddi qüsurların olduğunu sübut etməklə yanaşı, iqtidarın ölkədə sabitlik hökm sürməsi haqqında dediklərinin yalan olduğunu bir daha üzə çıxardı. Həmin hadisələrin ciddi və obyektiv araşdırılması və günahkarların cəzalandırılması tələb edilib.

Toplantının sonunda cari məsələlərə baxılıb.

isagambar.az, 13 sentyabr 2010-cu il, Bakı