“AXCP–Müsavat” siyasi partiyalar blokunun BƏYANATI

2006-cı ilin noyabrın 26-dan etibarən ölkədə faktiki olaraq fövqəladə vəziyyət rejimi hökm sürür. Müxalifətin kütləvi aksiyalarına birdəfəlik qadağa qoymuş iqtidar, ancaq bu yolla özünü ümumxalq qəzəbindən və qınağından qorumaq istəyir. Bu illər ərzində müxalifətinin kütləvi aksiyalar keçirmək üçün çoxlu sayda müraciətləri qanunsuz olaraq rədd edilib. Sonuncu dəfə AXCP və Müsavat Partiyasının oktyabr ayının 10-da mitinq keçirmək haqqında müraciətinə, Bakı şəhəri İcra Hakimiyyətinin cavabında bildirilmişdi ki, oktyabr ayının 15-də seçki təbliğatı kampaniyası başladığından, aksiyaları həmin dövrdə keçirmək olar. Bundan sonra oktyabr ayının 17-də mitinq keçirmək üçün yenidən Bakı şəhəri İcra Hakimiyyətinə müraciət edildi. Lakin Bakı şəhəri İcra Hakimiyyəti budəfəki cavabında bildirdi ki, seçki kampaniyası dövründə aksiyaları yalnız seçicilərlə görüşlər üçün ayrılmış yerlərdə keçirmək.

“AXCP-Müsavat” siyasi partiyalar bloku Bakı şəhəri İcra Hakimiyyətinin bu cavabını qətiyyətlə pisləyərək bildirir ki, seçki təbliğatı kampaniyası nə ölkə Konstitusiyasının 49-cu maddəsinin, nə də “Sərbəst toplaşmaq azadlığa haqqında” qanunun fəaliyyətini dayandıra bilməz. Bununla bir daha sübut olunur ki, hakimiyyət səssiz-səmirsiz, cəmiyyətdə heç bir canlanmaya səbəb olmayacaq bir seçki keçirərək, onun nəticələrini növbəti dəfə saxtalaşdırmağa hazırlaşır. Biz ölkə və dünya ictimaiyyətinin diqqətini bu problemə cəlb etməklə, yanaşı noyabrın 7-də keçiriləcək parlament seçkilərini izləyən beynəlxalq təşkilatlar Azərbaycan hakimiyyətinin bu qanunsuz hərəkətlərini qınamağa çağırırıq. Bildiririk ki, xalqın fundamental hüquqlarını kobud şəkildə tapdalayan iqtidar gec-tez bu hərəkətlərinin cavabını verməli olacaq.

isagambar.az, 15 oktyabr 2010-cu il, Bakı