“AXCP–Müsavat” siyasi partiyalar blokunun BƏYANATI

“AXCP-Müsavat” siyasi partiyalar blokunun liderləri Avropa Şurası Parlament Assambleyasının 2010-cu il 7 noyabrda keçiriləcək parlament seçkilərində Pol Villenin rəhbərlik etdiyi Müşahidə Missiyası ilə görüşə dəvət edilib.

“AXCP-Müsavat” siyasi partiyalar bloku bununla bağlı bəyan edir:

Avropa Şurasının müvafiq strukturları, xüsusən də AŞ PA son illər Azərbaycanda keçirilən nəticələri saxtalaşdırılmış seçkilər və referendumlarla əlaqədar prinsipial mövqe nümayiş etdirməmiş, son seçkilərin Azərbaycanın hələ Avropa Şurası üzvü olmadığı dövrlərə nisbətən daha anti-demokratik keçməsinə, sərbəst toplaşmaq hüququnun faktiki ləğv olmasına, seçki kampaniyası müddətinin azaldılmasına, bu dövrdə bərabərhüquqlu rəqabət imkanlarının aradan qaldırılmasına biganə olub.
2009-cu ilin martında siyasi məhbuslarla bağlı məruzəçi (K.Ştasser) təyin edilməsinə baxmayaraq, bugünədək o, hələ də Azərbaycana gəlməyib.

Avropa Şurasının Venesiya Komissiyası Azərbaycanda Konstitusiyanın və Seçki Məcəlləsinin davamlı olaraq mürtəceləşdirilməsinə faktiki olaraq seyrçi mövqe tutub.

Avropa Şurası Azərbaycanda demokratiyanın inkişafı istiqamətində üzərinə düşən missiyanı yerinə yetirmir, Azərbaycan cəmiyyətinin demokratiyaya, seçkilərə etimadına sarsıdıcı zərbələr vurur. Nəticədə Azərbaycan demokratik qüvvələrinin Avropa Şurasına (Avropa İnsan Haqları Məhkəməsi istisna olmaqla) heç bir etimadı qalmamışdır.

Bütün bunları nəzərə alaraq “AXCP-Müsavat” siyasi partiyalar blokunun rəhbərliyi Avropa Şurası Müşahidə Missiyası ilə 20 oktyabr 2010-cu il tarixə təyin olunmuş görüşdə iştirakdan imtina edir.

isagambar.az, 16 oktyabr 2010-cu il, Bakı